दिपक न्यौपाने, बुटवल

मनाङ मस्र्याङ्दी क्लबले पहिलो पटक तिलोत्तमा गोल्ड कप फुटबल प्रतियोगिताको उपाधि जितेको छ । सुदूरपश्चिम ११ स्पोर्टस क्लबलाई सडनमा पराजित गर्दै मनाङले उपाधि जितेको हो ।

निर्धारित समय १–१ को बराबरीमा टुंगिएपछि खेल टाइब्रेकरमा पुगेको थियो । कोफी कौडीले खेलको ५९ औ मिनेटमा उत्कृष्ट फिनिसिङ गर्दै मनाङलाई अघि बढाए । तर त्यो अग्रता धेरैबेर भने टिकेन । खेलको ७१ औ मिनेटमा सुदूरपश्चिमका फागुराम चौधरीले गोल गर्दै खेल बराबरीमा पुर्याएका थिए ।

५/५ पेनाल्टीमा पनि बराबरी भएपछि खेल सडन डेथमा मनाङले सुदुरपश्चिमलाइ ८–७ ले हराएको थियो । पेनाल्टीमा मनाङका अजित गुरुङ गोल गर्न असफल रहे । सुदूरपश्चिमका फागुराम र माधव भन्डारीको प्रहार बाहिरिएको थियो । विजेता मनाङले उपाधिसहित ११ लाख ११ हजार १ सय ११ रुपैयाँ तथा सुदूरपश्चिमले ५ लाख ५५ हजार ५ सय ५५ प्राप्त गरेको छ । तिलोत्तमाको २२ औं संस्करणमा मनाङ पहिलो पटक च्याम्पियन बनेको हो ।

मनाङका जियानाथ शेख उत्कृष्ट गोलकिपर, आशिष गुरुङ उत्कृष्ट डिफेन्डर, मनाङका विशन गुरुङ उत्कृष्ट मिडफिल्डर, सुदूरपश्चिमका फागुराम चौधरी उत्कृष्ट फरवार्ड र मनाङका किरण श्रेष्ठ उत्कृष्ट प्रशिक्षक घोषित भएका थिए । उत्कृष्टले समान ३० हजार रुपैयाँ प्राप्त गरे । सुदूरपश्चिमका फागुराम चौधरी सर्वोत्कृष्ट खेलाडी घोषित भए र उनले स्कुटर प्राप्त गरे ।

बुटवल उपमहानगरपालीकाका प्रमुख खेलराज पाण्डे, एन्फाका केन्द्रिय उपाध्यक्ष दीर्घबहादुर (कुमार) केसी , यती हेल्मेटका महेश थैब , नगरपालीकाका प्रवक्ता शिप राना, जिल्ला फुटबल सघं रुपन्देहीका अध्यक्ष लोक पुन लगायतले विजेता, उपविजेता टोलीलार्य पुस्कृत गरे । रुपन्देही जिल्ला फुटबल संघको आयोजनामा चैत ४ गते सुरु भएको प्रतियोगितामा १० टोलीको सहभागिता रहेको थियो ।