विराटनगर (हाम्रो खेलकुद) – साविक विजेता विभागीय क्लब एपिएफ विराट गोल्डकप फुटबलको सेमिफाइनलमा प्रवेश गरेको छ । विराटनगरको सहिद रंगशालामा शनिबार राति भएको खेलमा भुटानको ड्रुक लुयल फुटबल क्लबलाई २–१ ले पराजित गर्दै एपिएफले अन्तिम चारमा स्थान पक्का गरेको हो ।

निर्धारित समय १–१ को बराबरीतर्फ उन्मुख खेलमा एपिएफले दोस्रो हाफको अतिरिक्त समयमा पेनाल्टी पाएपछि २–१ को अग्रता बनाउँदै जित पनि पक्का गरेको हो । खेलको तेस्रो मिनेटमा एपिएफका हरि कार्कीले हेडर गोलमार्फत अग्रता दिलाएका थिए । ड्रुकका गोलकिपरले सहि डाइव लगाए पनि हरिले हेडर गरेको बलले जाली चुमेको थियो ।

३४ औं मिनेटमा फोफाना इब्राहिमले उत्कृष्ट गोल गर्दै भुटानी टोली ड्रुकलाई बराबरीमा ल्याएका थिए । निर्धारित समय बराबरीतर्फ उन्मुख देखिएको बेला ७ मिनेट इन्ज्युरी समय थपिएको थियो । त्यही इन्ज्युरी समयको छैटौं मिनेटमा एपिएफले पेनाल्टी पाएको थियो ।

ड्रुक लुएलका खेलाडी कामगटे मुसाले हातले गोल लाइन क्लियर गरेपछि उनले रातो कार्ड पाएका थिए भने एपीएफले पेनाल्टी प्रहार गर्ने अवसर प्राप्त गरेको थियो । एपीएफका अर्मान्ड बेडुमले पेनाल्टीमा गोल गरेपछि एपीएफ अन्ततः २–१ ले विजयी हुँदै अन्तिम चारमा स्थान पक्का गर्न सफल भयो ।

आजको खेलमा निर्णायक गोल गरेका बेडुम प्लेयर अफ दी म्याच बनेका छन् । उनले नगद ११ हजार पुरस्कार प्राप्त गरे ।
प्रतियोगिताको विजेताले २० लाख १५ हजार प्राप्त गर्दा उप विजेता हुने टिमले १० लाख २५ हजार रुपैयाँ प्राप्त गर्ने छ ।
यसैगरी विधागत उत्कृष्ट खेलाडी तथा प्रशिक्षकलाई नगद २५ हजार रुपैया प्रदान गरिने छ ।

विराट गोल्डकपको मुख्य प्रायोजकको रुपमा काब्रा ग्रुप रहेको छ भने । टिकेटिङ पार्टनरको रुपमा खल्ती एप रहेको छ । विराट गोल्डकपका खेलहरु कान्तिपुर सिनेप्लेक्स टेलिभिजनमा प्रत्यक्ष प्रसारण पनि भइरहेको छ ।