दिपक न्यौपाने , बुटबल

मनाङ मस्र्याङ्दी क्लब २२ औं तिलोत्तमा गोल्डकप फुटबल प्रतियोगिताको फाइनलमा प्रवेश गरेको छ । बुटबल एन्फा टेक्निकल सेन्टर देविनगरमा जारी प्रतियोगिताको बिहीबार भएको दोस्रो सेमिफाइनलमा अर्को ए डिभिजन टोली फ्रेन्ड्स क्लबलाई ट्राइब्रेकरमा ४–३ ले हराउँदै मनाङ उपाधि नजिक पुगेको हो ।

निर्धारित समय २–२ को बराबरीमा टुंगिएपछि खेल टाइब्रेकरमा धकेलिएको थियो । शनिबार हुने फाइनलमा मनाङले सुदूरपश्चिम ११ स्पोर्टस क्लबको सामना गर्नेछ । दुवै टोलीमध्ये जो जितेपनि तिलोत्तमामा पहिलो उपाधि हुनेछ । ट्राइब्रेकरमा मनाङका लागि गोलकिपर जियानाथ शेख, अजित गुरुङ, बिसन गुरुङ, र आशिष गुरुङले गोल गरे । फ्रेन्ड्सका प्रेम भण्डारी, टोरीक र उत्तम राईले मात्र गोल गरे । कप्तान डोना थापा र रुपेश केसीले भने गोल गर्न सकेनन् ।

त्यसअघि निर्धारित समयमा २–० को अग्रतालाई जोगाउन सकेन । फ्रेन्ड्सका लागि एमिन्यू र उत्तम राईले गोल गरे । मनाङ आशिष गुरुङ र प्रशन्न श्रेष्ठले गोल गरे । सातौं मिनेटमा एमिन्यूको गोलबाट फ्रेन्ड्सले अग्रता लिएको छ । मनाङलाई दबाबमा राखेको फ्रेन्ड्सका लागि २६ औं मिनेटमा लक्ष्मण रुचालको क्रसमा उत्तमले वानटचमा गोल गरे ।

पहिलो हाफको इन्जुरी समयमा मनाङका कप्तान आशिषले गोल गर्दै गोलअन्तर कम गरे । दोस्रो हाफको दोस्रो मिनेटमा प्रशन्नले बराबरी गोल गर्दै मनाङलाई खेलमा फर्काए । खेलको अन्तिम समयमा फ्रेन्ड्सका डोनाको प्रहार खेर जाँदा फ्रेन्ड्स फाइनल पुग्ने सम्भावनाबाट टाढिएको थियो ।

फ्रेन्ड्सका प्रशिक्षक उर्जन श्रेष्ठले २ गोलको अग्रता हुँदा ओभर कन्फिडेन्टका कारण हार्नुपरेको बताए । भरपर्दा खेलाडी रुपेश केसी र डोना थापाबाट सोचे जस्तो प्रर्दशन हुन नसक्नु र पेनाल्टी चुकाउनुपनि मा मिस गर्नु नै हारको कारण रहेको सुनाए ।
फाइनललाई लिएर उत्साही देखिएका मनाङका व्यवस्थापक शिव लामाले पहिलो हाफमा टोली हतोत्साही देखिए पनि दोस्रो हाफमा जमेर खेलेका कारण अन्तिम समयमा जित निकाल्न सफल भएकोब बताए । पहिलो पटक तिलोत्तमा गोल्डकपको उपाधि जित्नेमा आफुहरु ढुक्क रहेको उनले जनाए ।

रुपन्देही जिल्ला फुटबल संघले आयोजना गरेको तिलोत्तमा गोल्डकपको विजेताले उपाधिसहित ११ लाख ११ हजार १ सय ११ तथा दोस्रो हुने टोलीले ५ लाख ५५ हजार ५ सय ५५ रुपैयाँ प्राप्त गर्नेछ । प्रतियोगिताका सर्वोत्कृष्ट खेलाडीले मोटरसाइकल तथा विधागत उत्कृष्ट खेलाडीले समान ३० हजार रुपैयाँ प्राप्त गर्नेछन् ।