काठमाडौं (हाम्रो खेलकुद) – सहिद स्मारक ए डिभिजन लिगको साविक विजेता मच्छिन्द्र फुटबल क्लब र चर्च ब्वाइज युनाइटेड क्लबको खेल बराबरीमा सकिएको छ । च्यासल मैदानमा सम्पन्न खेलमा मच्छिन्द्र पहिलो हाफमै १० खेलाडीमा समेटिएपनि खेल गोलरहित बराबरीमा टुंगिएको हो ।

पहिलो हाफमा थुप्रै अवसर सिर्जना गरेपनि चर्च ब्वाइजले अग्रता लिन सकेन । खेलको १२ औं मिनेटमा चर्च ब्वाइजका आशिष चौधरीको प्रहार पोस्टमा लाग्दै बाहिरिएको थियो । त्यसपछि २७ औं मिनेटमा आशिष चौधरीले बायाँ विंगबाट दिएको कटब्याकमा आशिष चापागाईंको प्रहारले पोस्टको दिशा लिन सकेन ।

तर पहिलो हाफको ३ मिनेट समय बाँकी रहँदा मच्छिन्द्र १० खेलाडीमा समेटियो । पुजन उपरकोटीले जोसेफ बेम्पाहलाई कुइनोले हानेपछि रेफ्री नविन्द्र महर्जनले सिधै रातो कार्ड देखाएका थिए । जोसेफले सुरुवातमा फल गरेपनि पुजनले आक्रोशमा कुइनो उठाएपछि रेफ्री उक्त निर्णय लिएका थिए ।

दोस्रो हाफमा मच्छिन्द्रले अस्वस्थ विमलको स्थानमा सौरभ लिम्बूलाई मैदानमा पठाएको थियो । काउन्टर अट्याकमा भर परेको मच्छिन्द्रले केहि अवसर पनि पाएको थियो । यता चर्च ब्वाइजले भने दोस्रो हाफमा संख्यात्मक फाइदा भएपनि सोचेजस्तो प्रदर्शन गर्न सकेन ।

यस बराबरीले चर्च ब्वाइजको अपराजित यात्रा कायम रहेपनि शीर्षस्थानमा उक्लने लक्ष्यमा भने धक्का लागेको छ । सुरुवाती तीन खेल जितेको चर्च ब्वाइज अघिल्लो खेलमा संकटासँग पनि गोलरहित बराबरीमा रोकिएको थियो ।

यता मच्छिन्द्र भने सुरुवाती २ खेल हारेपछि लगातार तीन खेलमा अपराजित छ । टोलीले ५ खेलमा ५ अंक जोडेको छ । चर्च ब्वाइज ५ खेलमा ११ अंकसाथ दोस्रो स्थानमा छ भने सातदोबाटो ५ खेलमा १२ अंकसाथ शीर्षस्थानमा रहेको छ ।