हेटौंडा (हाम्रो खेलकुद)– दुई दिनअघि राष्ट्रिय च्याम्पियन बनेको एपिएफलाई हराउँदै साविकको विजेता मनाङ मस्र्याङ्दी क्लब हेटौंडामा जारी टुबोर्ग हेटौडा अन्तर्राष्ट्रिय आमन्त्रण गोल्डकप फुटबल प्रतियोगिताको सेमिफाइनलमा पुगेको छ ।

हेटौंडा–१० स्थित फरेष्ट्री खेल मैदानमा भएको अन्तिम आठको खेलमा दुई दिन अघि सातौं राष्ट्रिय खेलकुदमा स्वर्ण पदक जितेको एपिएफ क्लबको चुनौती ३–२ गोलअन्तरले पराजित गर्दै प्रतियोगिताको उपाधि रक्षा अभियान सुरुवात गरेको हो । मनाङ दस खेलाडीमा सिमित भएर पनि नतिजा आफ्नो पक्षमा पारेको थियो ।

अफ्रिकन खेलाडी सिसकोले खेलको ३२ औं मिनेटमा गोल गर्दै मनाङलाई अग्रता दिलाएका थिए । उनले डोना थापाको कर्नर बलमा गोल गरेका थिए । ५५ मिनेटमा एपीएफका रञ्जन बिष्टलाई फाउल गरेबापत् मनाङका कप्तान सुजल श्रेष्ठलाई रेफ्री सुदिश पाण्डेले रातो कार्ड खाएका थिए । मनाङका लागि अफ्रिकन खेलाडी हफिज ओलावालेले ६६ औं मिनेटमा गोल गरेका थिए ।

ओलावाले ८४ औं मिनेटमा पनि थप गोल गर्दै टीमको अग्रतालाई बढाएका थिए । खेल सकिन दुई मिनेट बाँकी रहेको अवस्थामा एपिएफका अञ्जन बिष्टले गोल गर्दै खेलमा फर्किने संकेत गरेको थियो । अन्जनले थप समयको तेस्रो मिनेटमा गोल गर्दै मनाङको अग्रतालाई कम गरेका थिए । अञ्जनले ८५ औं मिनेटमा प्रहार गरेको क्रसबारमा लागेर फर्किएको थियो । एपिएफलाई स्वर्ण पदक दिलाउने क्रममा फाइनलमा दुई गोल गरेका थिए ।

मनाङका प्रशिक्षक छिरिङ लोप्साङले खेलाडीहरु फिटनेस अवस्था कमजोर भएको कारण खेलमा गाह्रो भएको बताए । एपीएफका प्रशिक्षक रत्नकाजी महर्जनले धेरै खेलाडी घाइते भएको कारण खेलमा गाह्रो भएको बताए । खेलमा एएफयु म्यान अफ दी म्याच मनाङका मिडफिल्डर डोना थापा घोषित भए । उनले ट्रफिसहित तीनहजार रुपियाँ प्राप्त गरे । सुमन भोम्जन स्मृति खेलकुद प्रतिष्ठानले आयोजना गरेको प्रतियोगिताको विजेताले ५ लाख र उपविजेताले ३ लाख रुपैयाँ प्राप्त गर्नेछन् ।

टुबोर्ग हेटौडा अन्तर्राष्ट्रिय आमन्त्रण गोल्ड कपमा सोमबारको खेल 

• संकटा क्लब काठमाडौंविरुद्ध डुकस्टार क्लब, भुटान