एजेन्सी – जर्मन बुन्डेसलिगामा बायर्न म्युनिखले जित निकाल्दै आफ्नो शीर्षतालाई बलियो बनाउँदा शीर्ष दौडमै रहेको बोरुसिया डर्टमुण्ड बराबरीमा रोकिएको छ ।

बायर्नले घरेलु मैदानमा १–० ले पछि परेको स्थिति उल्ट्र्यार अग्सवर्गमाथि ५–३ को रोमाञ्चक पूनरागमन जित निकालेको हो । एलिएन्ज एरिना म्युनिखमा शनिबार राति भएको खेलमा घरेलु टोली बायर्नको पूनरागमन जितमा बेन्जामिन पाभार्डले दुई तथा जोओ क्यान्सेलो, लिरोए साने र अलफन्सो डाभिसले समान एक गोल गरे ।

अग्सवर्गका मर्जिम बेरिसाले दुई तथा इर्भिन कारडोनाले एक गोल गरे । खेलको तेस्रो मिनेटमा नै मर्जिमले गोल गरेपछि बायर्न खेलमा पछि परेको थियो ।

१५औं मिनेटमा जोओ क्यान्सेलोले बराबरी गोल फर्काएपछि बायर्न खेलमा फर्कियो । १९औं मिनेटमा पाभार्डले साडियाे मानेको पासमा गोल गर्दै बायर्नलाई २–१ को अग्रता दिलाए ।

३९औं मिनेटमा पाभार्डले नै व्यक्तिगत दोस्रो तथा टोलीका लागि तेस्रो गोल गरेपछि बायर्न ३–१ ले अघि बढ्यो । ४५औं मिनेटमा लिरोए सानेले गोल गर्दै बायर्नलाई पहिलो हाफमै ४–१ को आरामदायी अग्रता दिलाए ।

६०औं मिनेटमा मर्जिमले पेनाल्टीमा गोल गरेपछि अग्सवर्गलाई खेलमा फर्काउने संकेत दिए । तर, ७४औं मिनेटमा अलफन्सोले गोल गरेपछि अग्सवर्गको खेलमा फर्कने सम्भावना टाढिदा बायर्न जिततर्फ अग्रसर बन्यो । इन्ज्युरी समयको थप गरिएको तेस्रो मिनेटमा इर्भिनले गोल गरेर खेललाई ५–३ को स्थितिमा ल्याएपनि टोलीको हार टार्न सकेन ।

यस जितसँगै शीर्षस्थानमा रहेको बायर्नले बोरुसिया डर्टमुण्डलाई २ अंकले पछि पारेको छ । बायर्नको २४ खेलबाट ५२ अंक तथा समान खेलबाट डर्टमुण्डको ५० अंक छ । पराजित अग्सवर्ग २७ अंक जोडेर १३औं स्थानमा छ ।

अर्काे खेलमासाल्केसँग २–२ गोलको बराबरीमा रोकिदा डर्टमुण्डले शीर्षस्थानको बायर्नसँगको अंक दुरी बराबरी गर्ने मौका गुमाएको छ । यो बराबरीले डर्टमुण्ड २ अंकले पछि परेको छ । डर्टमुण्डलाई रोकेको साल्के २० अंक जोडेर १७औं स्थानमा छ ।