काठमाडौं (हाम्रो खेलकुद) – जावलाखेल युथ क्लबले सहिद स्मारक ए डिभिजन लिगमा लगातार दोस्रो जित दर्ता गर्ने क्रममा न्युरोड टिम (एनआरटी) लाई पराजित गरेको छ ।

एन्फा कम्प्लेक्समा बिहीबार भएको खेलमा जावलाखेलले एनआरटीलाई २–१ ले पराजित गर्दै लिगमा लगातार दोस्रो जित दर्ता गर्न सफल भएको हो । यसअघि जावलाखेलले लिग च्याम्पियन मछिन्द्रलाई ३–१ ले पराजित गरेको थियो ।

जावलाखेलको जितमा कप्तान सिमन्त थापा र फोडे फोफानाले गोल गरे । एनआरटीका सन्जित विष्टले एक गोल फर्काए । सबै तीन गोल दोस्रो हाफमा भएको थियो ।

६८औं मिनेटमा कप्तान सिमन्त थापाले गोल गर्दै जावलाखेललाई १–० को अग्रता दिलाए । अब्दुल अजिजको फ्रिकिकमा पेनाल्टी बक्समा क्लियर हुन नसकेको बललाई सिमन्तले नियन्त्रणमा लिदै सुन्दर फिनिस गरे ।

७७औं मिनेटमा फोडे फोफानाले गोल गर्दै जावलाखेलको अग्रता दोब्बर पारे । जन्मजय धामीबाट बल खोस्दै समिराज थोकरले दिएको पासलाई अनमार्क रहेका फोडेले सहजै गोल गर्न सफल भएका थिए ।

८०औं मिनेटमा परिवर्तित खेलाडी सन्जित विष्टले गोल गर्दै खेललाई २–१ को स्थितिमा ल्याए । लालनुन्जामाले दिएको पासलाई सन्जितले दुई डिफेन्डरबीचबाट बल अघि बढाउँदै पहिलो बार च्यापेर गरेको प्रहारले जाली चुमेको थियो । त्यसपछि थप गोल निस्कन नसक्दा खेल जावलाखेलले आफ्नो पक्षमा पार्न सफल भयो ।

यस जितसँगै जावलाखेलको दुई खेलबाट ६ अंक पुगेको छ । लगातार दोस्रो हार बेहारेको एनआरटीले अंकको खाता खोल्न सकेको छैन । एनआरटी पहिलो खेलमा सातदोबाटो युथ क्लबसँग २–१ ले पराजित भएको थियो ।