काठमाडौं (हाम्रो खेलकुद) – खेलको इन्ज्युरी समयमा आत्मघाती गोल गरेपछि सहिद स्मारक ‘ए’ डिभिजन लिगमा थ्री स्टार पहिलो जितबाट वञ्चित बनेको छ ।

थ्री स्टारले फ्रेन्ड्स क्लबसँग ३–३ गोलको बराबरी खेल्दै अंक बाड्न बाध्य बनेको हो । ललितपुरको च्यासलस्थित च्यासल रंगशालामा मंगलबार भएको खेलमा थ्री स्टारका अजायी मार्टिन्स, योगेश गुरुङ र प्रदीप लम्सालले गोल गरे । फ्रेन्ड्सका कुशल फुयाल र अखरोरवेक उक्तामोवले गोल गर्दा एक गोल उपहार पाएको थियो ।

खेलको दोस्रो मिनेटमा नै अजायी मार्टिन्सको गोलबाट थ्री स्टारले सुरुवाती अग्रता लिएको थियो । १५औं मिनेटमा कुशल फुयालले गोल गर्दै खेललाई १–१ गोलको बराबरीमा ल्याए । २४औं मिनेटमा योगेश गुरुङले गोल गरेपछि थ्री स्टारले खेलमा २–१ को अग्रता लिन सफल भयो ।

४३औं मिनेटमा अखरोरवेक उक्तामोवले गोल गरेपछि पहिलो हाफमा २–२ गोलको बराबरीमा सकिएको थियो । ८७औं मिनेटमा परिवर्तित खेलाडी प्रदीप लम्सालले गोल गरेपछि थ्री स्टार खेलमा पुनः ३–२ को अग्रता लिदै जिततर्फ अघि बढेको थियो । प्रदीप ८३औं मिनेटमा अनोज गैरेको स्थानमा मैदान छिरेका थिए ।

तर, जिततर्फ अग्रसर थ्री स्टार अन्तिम समयमा सम्हालिन नसक्दा आत्मघाती गोल खाँदै बराबरीमा रोकिन बाध्य बन्यो । इन्ज्युरी समयको थप गरिएको पाँचौं मिनेटमा अनिल महर्जनले आफ्नै पोस्टमा गोल गर्न पुगेका थिए ।

यस बराबरीसँगै दुवै टोलीले लिगमा अंकको खाता खोलेको छ । दुवै टोलीले लिगको पहिलो खेल गुमाएका थिए ।