काठमाडौं (हाम्रो खेलकुद) – ललितपुरको थ्री स्टार क्लब र युरो प्यासन अमेरिका (स्पोर्ट्स ब्राण्ड) बीच किट्स प्रायोजनका लागि सम्झौता भएको छ ।

यससँगै थ्री स्टारले यसपालीको सिजनमा युरो प्यासन अमेरिका (स्पोर्ट्स ब्राण्ड) को खेल सामग्री प्रयोग गर्नेछ । थ्री स्टार क्लब तथा नेपाली राष्ट्रिय फुटबल टोलीक पूर्व खेलाडी प्रलय राजभण्डारी निर्देशक रहेको युरो प्यासन अमेरिका (स्पोर्ट्स ब्राण्ड) ले आफ्नो पूर्व क्लबका लागि आवश्यक किट्स प्रायोजन गरेका हुन् ।

युरो प्यासन पाकिस्तानमा निर्मित अन्तर्राष्ट्रिय स्तरको स्पोर्ट्स ब्रान्ड हो । युरो प्यासनका सिइओ माजिद हुसैनले र युरो प्यासन युएसएका निर्देशक प्रलय राजभण्डारीले नेपालकै शीर्ष क्लबसँग सहकार्य गर्न पाउँदा अत्यन्त हर्षित भएको बताउँदै आगामी दिनमा यो सहकार्यलाई निरन्तरता दिदै अन्य खेलकुद गतिविधिमा पनि संलग्न हुने योजना रहेको बताए ।

शुक्रबार सम्झौता पत्रमा हस्ताक्षरपछि किट्स हस्तान्तरण गर्दै युरो प्यासन युएसएका निर्देशक अविशेश सुवेदीले थ्री स्टारलाई लिगका लागि शुभकामनासहित आगामी दिनमा थ्री स्टार क्लब र नेपाली खेलकुदमा निरन्तर सहयोग गर्दै जाने बताए ।

क्लबका अध्यक्ष अरुणमान जोशीले सहकार्यका लागि युरो प्यासन युएसएलाई धन्यबाद व्यक्त गर्दै अहिले सम्बन्धको सुरुवात भएको र यसलाई दीर्घकालीन रुपमा लैजाने बताए । उनले आगामी दिनमा उत्कृष्ट प्रदर्शन गर्दै सर्वाधिक समर्थक भएको थ्री स्टारको छविलाई अझ परिष्कृत गर्दै जाने थपे ।