काठमाडौं (हाम्रो खेलकुद) – नेपाली राष्ट्रिय फुटबल टोलीका फरवार्ड विमल घर्ती मगर जिनियस आईबी वर्ल्ड स्कुलको जिनियस स्पोर्ट्स एम्बासडर नियुक्त भएका छन् ।

ललितपुरको लुभुमा रहेको जिनियस आईबी वल्र्ड स्कुलले विमललाई शुक्रबार स्पोर्ट्स एम्बासडरमा नियुक्त गरेको हो । सम्झौता पत्रमा जिनियसका अध्यक्ष नवीनकुमार जोशी र विमलले एक कार्यक्रमबीच हस्ताक्षर गरे । पछिल्लो दुई वर्ष मछिन्द्रबाट खेल्दै लिग जितेका विमल यसपटक ह्याट्रिक गर्ने लक्ष्यसहित सोही क्लबबाट खेल्दैछन् ।

जिनियसका शैक्षिक प्रमुख प्रदीप वज्राचार्यले विमलले जिनियसको फुटबल टोलीलाई प्रशिक्षण दिनुपर्ने, जिनियसको कार्यक्रममा सहभागी हुनुपर्ने, जिनियसको प्रवर्द्धन लगायतका कार्यमा सहयोग गर्ने जानकारी दिए ।

अध्यक्ष जोशीले सम्झौता तत्काल १ वर्षका लागि भएपनि आगामी वर्षमा पनि निरन्तरता पाउने बताउदै जिनियसमा आबद्ध भएको विमललाई धन्यवाद दिए । विमलले जिनियसको फुटबल जर्सी सार्वजनिक गर्नुका साथै जिनियसको छात्र/छात्रा टोलीलाई प्रशिक्षण पनि दिएका थिए ।

कार्यक्रममा विमलले जिनियससँग जोडिन पाउँदा खुशी लागेको बताउदै जिनियसको फुटबललाई माथि उकास्न र विद्यालयको प्रवद्र्धनमा सक्दो सहयोग गर्ने प्रतिबद्धता जनाए ।

शैक्षिक प्रमुख वज्राचार्यले राष्ट्रिय फुटबल टोलीका महत्वपूर्ण सदस्य विमललाई जिनियसमा आबद्ध गर्न पाउँदा गर्वको अनुभुति भएको बताउदै विमलको आगमनले जिनियसको फुटबलसंगै अन्य गतिविधको पनि उचाईं बढ्ने विश्वास व्यक्त गरे ।