काठमाडौं (हाम्रो खेलकुद) – क्यामरुनी फरवार्ड मेसुके ओलोमोउको गोलमा नव प्रवेशी एफसी खुमलटारले सहिद स्मारक ‘ए’ डिभिजन लिगको डेब्यु खेलमै जित निकालेको छ ।

खुमलटारले आफ्नो शीर्ष डिभिजनको पहिलो खेलमा नै फ्रेन्ड्स क्लबलाई १–० ले पराजित गर्दै शीर्ष डिभिजनमा डेब्यु खेलमै जित निकाल्दै सुखद् सुरुवात गरेको हो ।

खुमलटारको जितमा खेलको अन्तिमतिर मेसुकेले गरेको गोल नै निर्णायक बन्यो । उनले ८९औं मिनेटमा गोल गर्न सफल भएका थिए । कप्तान जय गुरुङले दिएको पासलाई मेसुकेले नियन्त्रणमा लिदै गोल गर्न सफल भएका थिए ।

त्रिपुरेश्वरस्थित दशरथ रंगशालामा शुक्रबार भएको उद्घाटन खेलमा फ्रेन्ड्सले खुमलटारलाई खेलको अन्तिम समयसम्म रोक्न नसक्दा हारबाट लिगको शुरुवात गरेको छ ।

१७औं मिनेटमा जयको पासमा मेसुकेको प्रहार दोस्रो बार च्याप्दै बाहिरियो । लगत्तै १८औं मिनेटमा श्यामबाबु क्याप्छाकीको पासमा कप्तान प्रकाश बुढाथोकीले मौका चुकाउँदा फ्रेन्ड्स पनि अग्रता लिनबाट चुक्यो ।

७२औं मिनेटमा स्टेफन समिरले करिव १८ यार्डबाट गरेको फ्रिकिक प्रहार बारमा लागेर फर्कदा खुमलटार अग्रता लिनबाट चुक्यो । ७५औं मिनेटमा मेसुकेको डिबक्स भित्रको हेडर फ्रेन्ड्सका गोलरक्षक राजा बाबु थापाले मुस्किलले बचाए ।

८०औं मिनेटमा फ्रेन्ड्सका लक्ष्मण रुचालको फ्रिकिकमा उत्तम राईको हेडर पोस्ट नजिकबाट बाहिरिएको थियो । यस जितसँगै खुमलटारले ३ अंक जोडेको छ ।

लिग अन्तरगत शनिबार तीन खेल हुनेछ । च्यासल रंगशालामा दिउँसो २ः३० बजे नेपाल पुलिस क्लब र ‘ए’ डिभिजनको नव प्रवेशी चर्च ब्वाइज युनाइटेडबचि खेल हुनेछ ।

दशरथ रगशालामा दिउँसो २ः३० बजे एपिएफ र थ्री स्टार तथा साँझ ५ः३० बजे मनाङ र हिमालयन शेर्पाबीच प्रतिस्पर्धा हुनेछ ।