मध्यपुर (हाम्रो खेलकुद)– राष्ट्रिय फुटबल टोलीका पूर्व कप्तान उपेन्द्रमान सिंहले व्यवसायिक खेल जीवनबाट अलग भएपनि फुटबल संगको नाता तोड्न सकेनन् । झन्डै डेढ दशक राष्ट्रिय टोली तथा व्यवसायिक जीवनमा देश भित्र र बाहिरका क्लबको गोलपोस्ट सम्हालेका उपेन्द्र आफ्नै ठाँउमा फुटबलमै केही गर्न चाहन्थे । स्थानियहरुसँगको सल्लाह र स्थानिय राजनीति कर्मी अष्टकुमार कवेको विशेष पहलमा उपेन्द्र आफनै ठाँउको परिचय झल्कने गरि मध्यपुर युथ एसोसिएसन गठन गर्न सफल भए ।

व्यवसायिक फुटबल क्लब र नयाँ पुस्तालाई फुटबलको गुण सिकाउने उद्देश्यका साथ सुरु भएको मध्यपुर शनिबार नवौं बर्ष पुरा गरेर दर्शौ बर्षमा प्रवेश गरेको छ । विशेष अवसरमा एसोसिएसनले शनिबार कार्यक्रम आयोजना गर्दै खुसीयाली साटेको थियो । स्थानिय अविभावक र विद्यालयहरुको विशेष सहयोग रहेको क्लबले ग्रासरुट फुटबल प्रशिक्षण कार्यक्रम सञ्चालन गर्दै आएको छ । स्थानिय १४ विद्यालयका ९ देखि १५ बर्ष उमेरका झन्डै २ सय ५० विधार्थीलाई एसोसिएनले हरेक सातको अन्त्यमा प्रशिक्षण दिदै आएको छ । त्यसबाहेक क्लबले व्यवसायिक फुटबललाई अघि बढाउने क्रममा अखिल नेपाल फुटबल संघ (एन्फा) ले सञ्चालन गर्ने सहिद स्मारक लिगमा पनि आफुलाई समाहित गरेको छ । सिमित साधन श्रोतका वावजुद टोलीले सी डिभिजन हुँदै पाँच बर्षअघि ए डिभिजनसम्मको यात्रा तय गरिसकेको छ ।

यद्दपी टोलीले ए डिभिजन हैसियत लामो समय जोगाउन सकेन, अहिले बी डिभिजन लिगमा छ । मध्यपुरले विशेषत स्थानिय खेलाडीलाई मौका दिदै आएको छ । अहिले राष्ट्रिय टोलीका गोलकिपर विकेश कुथु एसोसिएसनका उत्पादन हुन् । दसौं बर्ष प्रवेशलाई विशेष बनाउने क्रममा एसोसिसएनका अध्यक्ष उपेन्द्र, उपाध्यक्ष अष्टनारायण अन्य पदाधिकारी, प्रशिक्षार्थी र अविभावकले संयुक्तरुपमा केट काटे । कार्यक्रममा उपस्थित सबैले क्लबको कामको सरहाना गरे र थप सफलताका लागि शुभकामना दिए ।

मध्यपुरस्थित फुटबल मैदानमा आयोजित कार्यक्रमका अवसरमा जेनेरेसन अमेजिङको कार्यक्रमलाई नेपालमा सञ्चालन गरिरहेको मर्सी क्रप्र्स र मध्यपुरले संयुक्त पहलमा तयार पारेको विकासका लागि फुटबल श्रोत पुस्तिकाको विमोचन समेत गरिएको थियो । श्रोत पुस्तिकामा नेपालमा फुटबल , प्रतियोगिता, आधारभूत शब्दाबली, फुटबलका नियम, आहार, कौशलताको विकास, फुटबल र सामाजिक विकास समेटिएको छ ।

विद्यालयलाई लक्षित गरि तयार पारिएको श्रोत पुस्तिकामा विकासका लागि फुटबल, कसरी खेल आयोजना गर्ने, व्यक्तिगत कला विकासका लागि प्रशिक्षण, केही साना अभ्यास खेलहरुका बारेमा पनि जानकारी दिइएको छ । कार्यक्रममा मर्सीले एसोसिएसनलाई प्रशिक्षणका लागि दुई दर्जन फुटबल प्रदान गरेको थियो । मध्यपुर मर्सीले सञ्चालन गर्ने फुटबल कार्यक्रमको प्राविधिक साझेदार संस्था पनि हो ।