काठमाडौं (हाम्रो खेलकुद)– इटालियन भिन्सेन्जो अल्बर्टो एनेसे नेपाली राष्ट्रिय फुटबल टोलीका मुख्य प्रशिक्षक नियुक्त भएका छन् । अखिल नेपाल फुटबल संघ (एन्फा) को बुधबार बसेको कार्यसमितिको बैठकले एनेसेलाई मुख्य प्रशिक्षक नियुक्त गरेको थियो ।

सफल तर विवादित प्रशिक्षक कुवेती अब्दुल्लाह अल्मुताइरीको राजीनामा स्वीकृत भएयता राष्ट्रिय टोलीको मुख्य प्रशिक्षक पद रिक्त थियो । यद्दपी भदौ र कात्तिकमा भएका बंगलादेश र पाकिस्तानविरुद्धको मैत्रीपूर्ण खेलका लागि भने एन्फाले प्रदीप हुमागाई र प्रवेश कटुवाललाई कार्यवहाक प्रशिक्षक नियुक्त गरेको थियो ।

एन्फाले मुख्य प्रशिक्षकका लागि आवेदन माग गरेको थियो । जसमा १ सय ६८ जनाको आवेदन परेको उल्लेख गर्दै एन्फाले त्यसमध्ये २० जनालाई अन्तिम सुचीमा राखिएको थियो । त्यसमध्येबाट युइएफए प्रो लाइसेन्स प्राप्त एनेसेलाई नियुक्त गरेको एन्फाले आफ्नो वेबसाइडमार्फत जनाएको छ ।

भारतको आइएसएलमा नर्थ इस्ट युनाइटेडको कमान सम्हालेका एनेसेको प्रशिक्षकमा गोकुलम केरेला एफसीले दुई पटक आई लिग उपाधि जितेको थियो । ३८ वर्षे इटालियन प्रशिक्षकले सन् २०१९ मा बिलिचको राष्ट्रिय फुटबल टोलीलाई प्रशिक्षण दिएका थिए । एनेसेले बुधबार दशरथ रंगशालामा मछिन्द्र एफसी र सातदोबाटो युथ क्लबबीच केपी ओली फुटबल प्रतियोगिताको फाइनल हेरेका थिए ।