काठमाडौं (हाम्रो खेलकुद) – अखिल नेपाल फुटबल संघ (एन्फा) ले आयोजना गर्ने शहिद स्मारक ए, बी र सी डिभिजन लिगको मुख्य प्रायोजक बाहेक मार्केटिङ, ब्रोडकास्टिङ, डिजिटल र टिकेटिङको सम्पुर्ण अधिकार एमडिएस स्पोर्ट्स प्रालिले प्राप्त गरेको छ ।

एन्फाले आब्हान गरेको टेन्डर प्रक्रियाबाट एमडीएससीले भ्याटबाहेक १ करोड ९७ लाख रुपैयाँमा मुख्य प्रायोजकबाहेक मार्केटिङ, ब्रोडकास्टिङ, डिजिटल र टिकेटिङको अधिकार किनेको हो । एन्फाले सोमबार एन्फा कम्प्लेक्स सातदोबाटोमा पत्रकार सम्मेलन गर्दै एमडिएस स्पोर्ट्स प्रालिले अधिकार लिएको जनाएको छ ।

सोमबार नै एन्फा र एमडिएस स्पोर्ट्स प्रालिबीच सम्झौतामा हस्ताक्षर भएको छ । सम्झौतामा एन्फाको तर्फबाट महासचिव किरण राई र एमडिएस स्पोर्ट्स प्रालिको तर्फबाट अर्जुन घिमिरेले हस्ताक्षर गर्दै आदान–प्रदान गरे ।

यो सम्झौतासँगै एमडिएस स्पोर्ट्सले १ करोड ९७ लाख नेपाली रुपैयँ एन्फालाई प्रदान गर्नछ । एमडिएस स्पोर्ट्सले लिगका खेलहरुको प्रत्यक्ष प्रसारण स्पेस फोरके टेलिभिजनबाट गर्नेछ । यस सम्बन्धमा एमडिएस स्पोट्स प्रालि र स्पेस फोरके टेलिभिजनवीच सम्झौता भइसकेको छ ।

शहिद स्मारक ए डिभिजन लिग २०७९ यहि फागुन १९ गतेबाट शुरु हुदैछ । लिग तीन स्थान – दशरथ रंगशाला, च्यासल रंगशाला र एन्फा कम्प्लेक्सको खेल मैदान मा डबल राउन्ड रोबिनको आधारमा हुनेछ । लिगमा सहभागी सबै १४ टोलीले खेलाडी अनुबन्धसँगै प्रशिक्षणलाई पनि तिब्रता दिएको छ ।