दिपेश तिमल्सिना
काँकरभिट्टा –घरेलु टोली झापा ११ शनिबार हिमालयन शेर्पालाई टाइब्रेकरमा ५–३ ले हराउँदै मेची नेत्रालय काँकरभिट्टा गोल्ड कप फुटबल प्रतियोगिताको सेमिफाइनलमा पुगेको छ । निर्धारित समय २–२ को बराबरीमा टुंगिएपछि खेल टाब्रेकरमा गएको थियो ।

पेनाल्टीमा झापाका लागि कर्ण लिम्बु, रञ्जित धिमाल, बुद्ध चेम्जोङ, रवि थापा र योगेश गुरुङले गोल गरेका थिए । हिमालयनका लागि हेमन गुरुङ, रुपेश केसी र भुपाल गुरुङले गोल गरे । माउसा कामगाटेले गोल गर्न नसकेपछि अर्का खेलाडीले पेनाल्टी हान्नै परेन ।
झन्डै चार बर्षपछि घरेलु प्रतिस्पर्धामा फर्केको हिमालयन शेर्पा अन्तिम तिन मिनेट सम्हालिन नसक्दा गोल्ड कपको पहिलो खेलबाटै बाहिरिएको छ । २–१ ले पछि परेको अवस्थामा ८७ औं मिनेटमा झापाका योगेशले पेनाल्टीमा बराबरी गोल गरेका थिए । पेनाल्टी बक्समा हिमालयनका माउसा कामगाटेले बल ह्यान्ड गरेपछि झापाले पेनाल्टी पाएको थियो ।

दुवै टोली एक एक पटक खेलमा पछि परेर पनि पुनरागमन गर्न सफल भएका थिए । ३७ औं मिनेटमा पुजन उपरकोटीको गोलबाट झापाले अग्रता लिएको थियो । दोस्रो हाफमा दुई मिनेटको फरकमा दुई गोल गर्दै हिमालयन शेर्पाले २–१ को अग्रताता बनायो, तर जोगाउन सकेन ।

६२ औं मिनेटमा हेमनले झन्डै ३५ यार्ड टाढाबाट गोल गर्दै खेललाई १–१ को बराबरीमा ल्याएका थिए । दुई मिनेटपछि २५ मिनेटमा हेमनकै फ्रिकिकलाई रोक्ने क्रममा रवि थापाको आत्मघाती गोल भएको थियो । ८७ औं मिनेटमा झापाले पेनाल्टीमार्फत बराबरी गोल फर्काउँदै खेललाई टाइब्रेकरमा धकेलेको थियो । हिमालयन शेर्पाका हेमन खेलको म्यान अफ दी म्याच घोषित भएका थिए ।

काँकरभिट्टा गोल्डकपमा आइतबारको खेल
-काँकरभिट्टा ट्रेनिङ सेन्टरविरुद्ध ब्लु आर्मी सिलोङ,भारत