काठमाडौं (हाम्रो खेलकुद)– महिला राष्ट्रिय टोलीकी पूर्व खेलाडी ममता सिकेको निधन भएको छ । ३२ बर्षे ममताको काठमाडौं मेडिकल कलेजमा उपचारका क्रममा बिहीबार राती निधन भएको हो । ममताको जण्डिस रोगका कारण निधन भएको अखिल नेपाल फुटबल संघ (एन्फा) को महिला समितिकी सचिव विमला पौडेलले जानकारी दिइन् ।

ममताले सन् १९९९ मा फिलिपिन्समा भएको एसियन महिला च्याम्पियनसिप फुटबलमा नेपालको प्रतिनिधित्व गरेकी थिइन् । त्यस च्याम्प्यिनसिपको टोली नेतृत्व गरेकी एन्फा महिला फुटबल समितिकी अध्यक्ष कल्पनाले पिया श्रेष्ठले ममतालाई स्मरण गर्दै भनिन्, ‘एकदमै राम्रो डिफेन्डर हो । एकदम भिडेर खेल्न सक्ने क्षमता भएको खेलाडी हुन् ।’

उनले काठमाडौंमा २०५५ भदौंमा काठमाडौंमा भएको मेयर कपमा कैलालीबाट भाग लिएकी थिइन् । थ्रुपै स्थानिय प्रतियोगिता खेलेकी ममता समकालिन खेलाडीमा उत्कृष्ट रहेको एन्फाका विकास निर्देशक सञ्जिव मिश्रले बताए ।उनीले पछिल्लो पटक २०६५ मा धनगढीमा आयोजित राष्ट्रिय महिला प्रतियोगिता खेलेकी थिइन् ।

पछिल्लो समय उनी नील हिरा समाजको शाखा कार्यालय एकता नेपाल धनगढीको कार्यवहाक अध्यक्षका रुपमा सक्रिय थिइन् । पशुपति आर्यघाटमा शनिबार उनको संस्कार गरिएको छ । अन्तिम श्रद्धान्जलीका लागि परिवारजन, इष्ट मित्र, साथीहरु, एन्फा महिला समितिकी अध्यक्ष श्रेष्ठ, उपाध्यक्ष अञ्जु भट्टराई, सचिव पौडेल,पूर्व महिला खेलाडीहरुको उपस्थिति थियो ।