एजेन्सी – जर्मन क्लब बायर्न म्युनिख र अष्ट्रियन क्लब आरबी साल्जवर्गले मैत्रीपूर्ण खेलमा रोमाञ्चक बराबरी खेलेका छन् । जर्मन महारथी बायर्न र अष्ट्रियाको बलियो टोली साल्जवर्गले ४–४ गोलको रोमाञ्चक बराबरी खेलेका हुन् ।

म्युनिखमा शुक्रबार राति भएको खेलमा बार्यनले सुरुवाती अग्रता लिएपनि एक समय ३–१ ले पछि परेको थियो । तर, बार्यनले ३ मिनेटको अन्तरमा २ गोल गर्दै खेललाई ३–३ गोलको बराबरीमा ल्याएका थिए । अन्तिम समयमा दुवै टोलीबाट समान एक गोल भएपछि खेल ४–४ गोलको बराबरीमा टुंगियो ।

बार्यनले खेलको नवौं मिनेटमा लिरोए सानेको गोलबाट अग्रता लिएको थियो । १७औं मिनेटमा साल्जवर्गका सेकोउ कोइटाले गोल गर्दै खेललाई बराबरीमा ल्याए । त्यसपछि दोस्रो हाफमा साल्जवर्गले ३ मिनेटमा २ गोल गरेर खेलमा ३–१ को अग्रता बनाएको थियो ।

५१औं मिनेटमा करिम कोनाटे र ५४औं मिनेटमा नोहा ओकाफरले गोल गरेर बार्यनलाई ३–१ ले पछि पारेको थियो । ६९औं मिनेटमा अर्जोन इब्राहिमोभिचले तथा त्यसको दुई मिनेटपछि किङ्सले कोमानले गोल गर्दै खेललाई ३–३ गोलको बराबरीमा ल्याए ।

८८औं मिनेटमा माथिस टेलले गोल गर्दै बायर्नलाई खेलमा ४–३ ले अघि बढाए । तर, गोल खाएको अर्को मिनेटमा नोहा ओकाफरले व्यक्तिगत दोस्रो र टोलीका लागि चौथो गोल गर्दै खेललाई ४–४ गोलको बराबरीमा ल्याए ।