एजेन्सी – विश्व विजेता फरवार्ड लियोनेल मेस्सी विश्वकपपछि फर्किएको खेलमा शीर्षस्थानमा रहेको पेरिस सेन्ट जर्मेन (पिएसजी) ले फ्रेन्च लिग वानमा सहज जित हात पारेको छ ।

घरेलु मैदानमा पिएसजीले एन्जर्सलाई २–० ले पराजित गरेको हो । पार्क डेस प्रिन्सेसमा पिएसनीको जितमा ह्युगो इकिटिक र मेस्सीले गोल गरे ।

बुधबार राति भएको खेलको पाँचौं मिनेटमा ह्युगो इकिटिकले गोल गर्दै पिएसजीलाई पहिलो हाफका १–० को अग्रता दिलाए । उनले नोर्डी मकिएलीको पासमा गोल गर्न सफल भए ।

त्यसपछि ७२औं मिनेटमा मेस्सीले टोलीका लागि दोस्रो गोल गर्दै पिएसजीको जित पक्का गरे । मेस्सीले पनि नोर्डी मकिएलीको पासमा गोल गर्न सफल भएका थिए । मेस्सीले विश्वकपपछिको पहिलो खेलमा नै गोल गर्न सफल भएका हुन् ।

गत डिसेम्वरमा विश्वकप जितेपछि मेस्सी लामो समय विदामा थिए । विश्वकपपछि पिएसजीले योसहित ४ खेल खेलिसकेको छ । त्यसअघिको तीन खेलमध्ये पिएसजी लिग वानमा लेन्ससँग ३–१ ले पराजित भएको थियो ।

यस जितसँगै पिएसजीले शीर्षस्थानमा ६ अंकको स्पष्ट अग्रता बनाएको छ । पिएसजीको १८ खेलबाट ४७ अंक छ । दोस्रो स्थानमा रहेको लेन्सको ४१ अंक छ । पराजित एन्जर्स ८ अंक जोडेर पुछारमा छ ।

लिग वानमै नाइसले मोन्टपेलिएरलाई ६–१ ले पराजित गरेको छ । यस्तै मार्सेले ट्रोएसलाई २–० ले पराजित गरेको छ । लोरिएन्ट र मोनाको तथा स्टार्सवर्ग र लेन्सले समान २–२ गोलको बराबरी खेल्दै अंक बाँडेका छन् ।