काठमाडौं (हाम्रो खेलकुद) – राष्ट्रिय महिला फुटबल टोलीकी मिडफिल्डर तथा फरवार्ड प्रिती राईलाई अम्ब्रो नेपालले प्रायोजन गरेको छ । अम्ब्रोले प्रितीसँग एक वर्षको लागि ६ लाख रुपैयाँमा शुक्रबार प्रायोजन सम्झौता गरेको हो ।

सम्झौतामा प्रिती र भाटभटेनी होल्डिङ कम्पनीका प्रबन्ध निर्देशक पवन शर्राफले हस्ताक्षर गर्दै आदान–प्रदान गरे । प्रितीले नगद र खेलकुद सामग्री प्राप्त गर्नेछिन् । औपचारिक सम्झौता शुक्रबार भएपनि उनीसँगको सम्झौता ६ सेप्टेम्वर २०२२ बाट सुरु भएको र अर्काे वर्षको सेप्टेम्वरसम्म रहने बताइएको छ । गत भदौमा नेपालमा भएको महिला साफ च्याम्पियनसिप दौरान नै अम्ब्रोले प्रितीलाई प्रायोजन गर्ने घोषणा गरेको थियो ।

कार्यक्रममा बोल्दै भाटभटेनी होल्डीङ्स कम्पनीका बिजिनेस हेड आलोक जोशीले खेलकुदलाई सहयोग गर्ने क्रममा प्रितीसँग सहकार्य गरिएको बताए । सोही कार्यक्रम दौरान भाटभटेनी सुपर मार्केट तथा भाटभटेनी होल्डिङका निर्देशक कल्याण गुरुङले प्रितीलाई खेल सामग्री प्रदान गरेका छन् ।

सम्झौतापछि प्रितीले यस्तो खालको प्रायोजन सम्झौताले खेलमा थप हौसला पुग्ने बताउँदै आगामी दिनमा पनि निरन्तरता दिन आग्रह गरिन् । ‘विभिन्न आलोचना र हेपाहा सहेर आएको हु । सुरुमा परिवारको मात्रै सहयोग रहेको थियो । त्यसले मलाई उर्जा दियो ।’ सम्झौतापछि प्रितीले भनिन्, ‘घर र स्कुलबाट नै खेल्न थाले । स्कुलमा केटाहरुसँग पनि खेले । राम्रो हुँदै गए । जिल्ला छनोटदेखि अहिले राष्ट्रिय टोलीमा खेलिरहेको छु । अम्ब्रोले प्रायोजले थप हौसला मिलेको छ । अम्ब्रोलाई धन्यवाद ।’

सम्झौता कार्यक्रममा प्रितीका पहिलो प्रशिक्षक राजु सिंह पनि उपस्थिति थिए । उनले प्रितीलाई ९ वर्षको उमेरमा प्रशिक्षण दिएको स्मरण गर्दै आफुले सिकाएको खेलाडी राष्ट्रिय टोलीको हिस्सा बन्दा खुसी लागेको जनाउँदै थप सफलताको शुभकामना दिए ।

उमेर समूह हुँदै राष्ट्रिय टोलीको यात्रा तय गरेकी साेलुखुम्बुकी प्रितीले सिनियर टोलीमा पनि प्रभावशाली प्रदर्शन गरिरहेकी छिन् । प्रिती अर्काे महिना बंगलादेशमा आयाेजना हुने साफ यू–२० महिला च्याम्पियनसिप खेल्ने नेपालको टोलीमा समेत छिन् । प्रितीले गत वर्षको भदौमा दशरथ रंगशालामा बंगलादेशविरुद्धको पहिलो मैत्रीपूर्ण खेलबाट राष्ट्रिय टिममा डेब्यू गरेकी थिइन् । उनले नेपाली यू–१५ र यू–१८ टोलीको कप्तानी गरिसकेकी छिन् ।

अम्ब्रोले यसअघि लन टेनिस खेलाडी प्रेरणा कोइरालालाई पनि प्रायोजन गरेको थियो । यस्तै अम्ब्रोले एनएसएल टोली ललितपुर सिटी एफसीसँगै ‘ए’ डिभिजनको च्याम्पियन मछिन्द्र फुटबल क्लब र सातदोबाटो युथ क्लबलाई किट प्रायोजन गरेको थियो । अम्ब्रो विश्व प्रख्यात खेलकुदको ब्राण्ड हो । नेपालमा अम्ब्रोका सामानहरु भाटभटेनी सुपर मार्केटका स्टोरमा उपलब्ध छन् ।

यस्तै अम्ब्रोले ‘रोड टु वेस्ट ह्याम क्याम्पगेन’ शुरु गरेको छ । यसमा भाग्यशाली दुई विजेताले वेस्ट ह्याम युनाइटेड र म्यानचेस्टर युनाइटेडबीच ६ मे २०२३ हुने खेल हेर्न पाउने बताएको छ । सबै खर्च अम्ब्रो नेपालले नै गर्नेछ । यसमा सहभागी हुन भाटभटेनी सुपर मार्केटबाट कम्तीमा पनि ५ हजार रुपैयाको साम्रगी खरिद गर्नुपर्नेछ ।