विजय नेपाली, पोखरा

सहारा क्लब पोखराको आयोजनामा जारी आहा रारा पोखरा गोल्डकपको उपाधिका लागि संकटा र अमेरिकाको भुटानिज युथ स्पोर्टस भिड्दै छन् ।

भुटानिजले भने सर्वाधिक आहा गोल्डकप विजेता मनाङ मर्स्याङ्दी र पहिलो पटक आहा रारामा डेब्यु गरेको चर्च ब्वाइजलाई हराउँदै फाइनलको यात्रा गरेको हो । दुवै टिमलाई समान १–० को अन्तरमा हराएको हो । भुटानिजले दुई गोल गर्दा कुनैपनि गोल खाएको छैन । फाइनल खेलमा उत्कृष्ट फरवार्ड लिएर मैदानमा उत्रिएको संकटालाई भुटानिजको बलिया डिफेन्डरको चुनौतिको सामना गर्नुपर्ने भएको छ ।

अघिल्ला दुई खेलमा जुन रुपमा गोलको सिर्जना गरेको थियो सोहि अनुसार प्रहार गर्नबाट भने चुकिरहेको छ । जसले फरवार्ड लाइनमा कम्जोर रहेको देखिन्छ । उता संकटाको भने फरवार्ड लाइन निकै बलियो छ । दुई क्यामरुनी फरवार्डका साथ मैदान उत्रिएको संकटाले हालसम्म सर्वाधिक गोल समेत गरेको छ । जारी प्रतियोगिताको सर्वाधि गोलकर्ताको सूचीमा संकटामात्रै हाबि छ ।

संकटाका मुख्य प्रशिक्षक सल्यान खड्गीले आफुहरुलाई विपक्षि खेलाडीको उचाईले प्रभाव पार्न सक्ने बताए । उनले शारिरीक रुपमा आफुहरु कम्जोर रहेपनि मानसिक रुपमा भने बलियो रहेको बताए । ‘हरेक टिम जित्नका लागि नै आउने हो । हामीले तयारी राम्रो गरेका छौं । हामीलाई फिजिकल्ली रुपमा केहि बाधा छन्’ उनले भने,‘तर गेम फिजिकल्ली मात्रै खेलेर हुँदैन् । टेक्निकल रुपमा पनि खेल्नुपर्छ । हामी त्यसमा सक्षम छौं । जे हो फाइनल खेल निकै प्रतिस्पर्धी हुनेछ ।’

कप्तान सुनिल बलले विदेशी अनुभव लिने मौका पाएको बताए । उनले फाइनल खेल अघि भएको पत्रकार सम्मेलनमा बोल्दै आफुहरु फाइनलका लागि तयार रहेको समेत सुनाए । ‘हामीले विदेशी अनुभव लिने मौका पाएका छौं । यो खेल हामीले अनुभवका लागि खेल्ने छौं । प्रशिक्षकले भनेझैं खेल निकै प्रतिस्पर्धाको हुनेछ’ उनले भने

जारी प्रतियोगितामा कुल २० गोल भएका छन् । जसमा सर्वाधिक गोलकर्ताको सूचीमा संकटा रहेको छ । संकटाका स्टेफन र मेस्सुकेको समान ३-३ गोल रहेको छ । यस्तै प्रतियोगिताभर कुल २८ वटा पहेंलो कार्ड देखाइएको छ भने एक मात्र रातो कार्ड देखाइएको छ ।