एजेन्सी – स्पेनिस ला लिगा टोली रियल म्याड्रिड संघर्षपूर्ण जित निकाल्दै कोपा डेल रेको प्रि–क्वाटरफाइनलमा प्रवेश गरेको छ ।

दोस्रो डिभिजनको क्यासेरेनोमाथि १–० को जित निकाल्दै रियलले अन्तिम १६ मा स्थान पक्का गरेको हो । रियलको जितमा दोस्रो हाफमा ब्राजिली विंगर फरवार्ड रोड्रिगोले गरेको गोल नै निर्णायक बन्यो ।

कासेरेसमा मंगलबार राति भएको खेलमा घरेलु टोली क्यासेरेनाले रियललाई बलियो चुनौती पेश गरेपनि दोस्रो हाफमा भने रोक्न सकेन । ६९औं मिनेटमा रोड्रिगोले घरेलु टोलीको रक्षापङ्ति चिर्दै गोल गर्न सफल भयो । उनले ड्यानियल सेवालोसको पासमा गोल गर्न सफल भएका थिए ।

क्यासेरेनोविरुद्ध रियलले अधिकांश दोस्रो रोजाईको खेलाडी उतारेको थियो । प्रशिक्षक कार्लाे एन्सेलोटीले इडेन हाजार्डसँगै रोड्रिगो, मार्काे एसेन्सियो, ड्यानियल सेवालोस, अल्भारो ओर्डिओजोला, लुकास भास्क्वेज, नाँचो फर्नान्डेस र गोलरक्षक एन्ड्री लुनिनलाई मौका प्रदान गरेको थियो । दोस्रो हाफमा जेसस भालेजोसँगै अल्भारो रोड्रिग्वेज, फेडे भाल्भेर्डे र एन्टेनियो रुडिगरलाई मैदान पठाएको थियो ।

क्यासेरेनो गत साता मात्रै नेपालमा दुई मैत्रीपुर्ण खेल खेल्न नेपाल आएको थियो । पोखरा ११ लाई ३–० ले हराएको क्यासेरेनोले काठमाडौं ११ लाई २–१ ले पराजित गरेको थियो ।

यस्तै भिल्लारियल, इस्पान्योल, भ्यालेन्सिया, एडी क्वेटा एफसी, लेभान्टे र स्पोर्टिङ गिजोनले पनि प्रि–क्वाटरफाइनलमा स्थन बनाएको छ ।