विजय नेपाली, पोखरा

आहा! रारा गोल्डकपको सर्वाधिक सफल टोली मनाङ मर्स्याङ्दी क्लब २२ औं संस्करणमा पहिलो खेलबाट नै बाहिरिएको छ । मंगलबार भएको क्वाटरफाइनलमा अमेरिकाको भुटानी युथ स्पोर्ट्स क्लबसँग पराजित भएपछि मनाङ बाहिरिएको हो ।

पोखरा रंगशालामा अमेरिकी टोलीले १-० को जित दर्ता गर्दै सेमिफाइनलमा स्थान पक्का गर्यो । खेलको पहिलो हाफमा प्रविन बस्नेतले गरेको गोल नै मनाङको हारमा निर्णायक बन्यो । उनले पेनाल्टी क्षेत्र भित्रबाट डिफेन्स र गोलरक्षकलाई बिट गरेको प्रहार गोलमा परिणत भएको थियो ।

नयाँ स्वरूपमा घरेलु खेलाडीसहित उत्रिएको मनाङले सुखद सुरुवात गर्न सकेन । गण्डकी प्रदेशकै अधिकांश खेलाडीसहित स्थानीय प्रशिक्षक किरण श्रेष्ठले टोलीलाई जिताउन सकेनन् । पाहुना टोली बिवाईएससीले पहिलो हाफमा लिएको अग्रता जोगाएर अन्तिम ४ को यात्रा पक्का गर्यो ।

मनाङले २२ संस्करणमध्य १२ पटक फाइनल खेल्दै ६ पटक उपाधि जित्दा ६ पटक उपविजेतामा चित्त बुझाएको थियो । गत संस्करण मनाङ एपिएफसँग फाइनलमा पराजित भएको थियो । बिवाईएससीको यो दोस्रो सहभागिता हो । अघिल्लो संस्करणमा पहिलो खेलमै पराजित टोलीले यसपटक भने क्वाटरफाइनल जित्दै अन्तिम चारको यात्रा तय गरेको छ ।

बिवाईएससीले अब सेमिफाइनलमा चर्च ब्वाइज युनाइटेडको सामना गर्नेछ । बुधबार हुने खेलमा नेपाल एपिएफ क्लब र संकटा क्लबले पहिलो सेमिफाइनलमा प्रतिस्पर्धा गर्नेछन् । विहीबार दोस्रो सेमिफाइनल हुनेछ । फाइनल शनिबार हुनेछ । प्रतियोगिताको विजेताले उपाधिसहित १२ लाख र दोस्रो हुने टोलीले ६ लाख रुपैयाँ प्राप्त गर्नेछ ।