लमजुङ (हाम्रो खेलकुद) – बागमती युवा क्लब सर्लाही र रोड्स रामपुर लमजुङ सदरमुकाम बेशीसहरमा जारी ३०औं त्रिवेणी कप राष्ट्रव्यापी खुला फुटबल प्रतियोगिताको फाइनलमा प्रवेश गरेका छन् ।

बेसिशहर नगरपालिका– ७ को सहजीस्थित त्रिवेणी रंगशालाको खेल मैदानमा सोमबार भएको पहिलो सेमिफाइनलमा बागमतीले सामना युवा क्लब तुरतुरे तनहुँलाई २–० ले पराजित गर्दै फाइनलमा स्थान बनाउन सफल भयो ।

बागमतीको जितमा सनम धिमाल र देव गुरुङले गोल गरे । खेलको २०औं मिनेटमा सनमको गोलबाट बागमतीले पहिलो हाफमा १–० को अग्रता लिन सफल भयो । ६८औ मिनेटमा देवले गोल गर्दै बागमतीलाई २–० को जित पक्का गरे ।

सोमबार भएको दोस्रो सेमिफाइनलमा रोड्स रामपुरले समाज कल्याण खेलकुद केन्द्र काठमाडौंलाई १–० ले पराजित गर्दै फाइनलमा बागमतीसँगको भेट पक्का ग¥यो ।

रामपुरको जितमा पहिलो हाफका विदेशी खेलाडी फोडे फोफानाले गरेको गोल नै निर्णायक बन्यो । उनले १०औं मिनेटमा गोल गरेका थिए ।

सेमिफाइनलमा पराजय भोगेका सामना र समाज कल्याणले समान ५० हजार रुपैया प्राप्त गर्नेछ । फाइनल मंगलबार दिउँसो २ बजेपछि हुने आयोजक त्रिवेणी क्लबले जनाएको छ ।

जिल्लाकै सर्वाधिक पुरस्कार राशी रहेको प्रतियोगिताको विजेताले ५ लाख रुपैयाँ, त्रिवेणी कप, स्वर्णपदक र प्रमाणपत्र प्राप्त गर्नेछ । उपविजेताले ३ लाख रुपैयाँ, रजतपदक र प्रमाणपत्र पाउनेछन् ।

सर्वोत्कृष्ट खेलाडी र सर्वाधिक गोलकर्तालाई समान १५ हजार रुपैयाँ, स्वर्णपदक र प्रमाणपत्र प्रदान गरिने छ । लमजुङकै सर्वाधिक प्रतिष्ठित त्रिवेणी कप राष्ट्रव्यापी फुटबल प्रतियोगिता कोरोना महामारी अवधिको १ वर्ष बाहेक निरन्तरण संचालन हुँदै आएको छ ।