एजेन्सी – एटलेटिको म्याड्रिडका पोर्चुगिज स्टार जोआओ फेलिक्स लोनमा प्रिमियर लिग क्लब आउने चर्चा रहेको छ । स्पेनिस क्लबमा प्रशिक्षक डिएगो सिमिओनीसँग सम्बन्ध चिसिएपछि फेलिक्स बाहिरिने पक्काजस्तै छ ।

स्पेनिस क्लबको इतिहासमै सर्वाधिक महँगा खेलाडी फेलिक्सको प्रदर्शन सोचेजस्तो हुन सकेको छैन । क्लबमा आबद्ध भएको साढे तीन वर्ष बितिसक्दा पनि उनी टोलीको मुख्य खेलाडीको रुपमा स्थापित हुन सकेका छैनन् । एटलेटिकोले १ सय २७ मिलियन युरो खर्चेर उनलाई अनुबन्ध गरेको थियो ।

फेलिक्सले क्लबका लागि १ सय ३० खेल्ने क्रममा ३४ गोल गरेका छन् । पटक पटक चोटका कारण बाहिर रहेका उनले क्लबमा आफ्नो भविष्य नदेखेपछि बाहिरिने मनस्थिति बनाएका छन् । क्लबको प्रशिक्षण टोलीसँग पनि राम्रो सम्बन्ध नरहेपछि उनी बाहिरिने सम्भावना बढेको हो ।

फेलिक्सलाई अनुबन्ध गर्न प्रिमियर लिगका म्यानचेस्टर युनाइटेड र आर्सनलले इच्छा देखाएपनि एटलेटिकोको माग भने पुरा गर्न नसक्ने बुझिएको छ । द एथलेटिकका अनुसार एटलेटिकोले ६ महिनाको लोन र तलब गरेर २१ मिलियन युरो माग गरेको छ । चेल्सीलाई पनि फेलिक्स अनुबन्धनको प्रस्ताव गरिएको थियो, तर क्लबले डेविड फोफाना अनुबन्ध गरेको छ ।

क्लबका प्रमुख कार्यकारी मीगुएल एन्जलले नै फेलिक्सले क्लब छाड्ने स्वीकारेका छन् । ‘अहिलेको अवस्थामा उनले क्लब छाड्नेछन् भन्ने सोच बनाउनु उचित हुन्छ । म व्यक्तिगत रुपमा उनी क्लबमा रहेको हेर्न चाहन्छु । तर खेलाडीको सोच यस्तो छैन,’ उनले भनेका थिए ।

पोर्चुगलको भविष्यको रुपमा हेरिएका फेलिक्सले राष्ट्रिय टोलीबाट पनि २८ खेल खेलिसकेका छन् । २३ वर्षीय फेलिक्स आक्रमणमा निकै छरितो खेलाडीको रुपमा चिनिन्छन् ।