लमजुङ (हाम्रो खेलकुद) – सामना युथ क्लब तुरतुरे तनहुँ र समाज कल्याण खेलकुद केन्द्र काठमाडौं लमजुङ सदरमुकाम बेशीसहरमा जारी ३०औं त्रिवेणी कप राष्ट्रव्यापी खुला फुटबल प्रतियोगिताको सेमिफाइनलमा प्रवेश गरेका छन् ।

बेशीसहरको सहजीस्थित त्रिवेणी रंगशालामा आइतबार भएको क्वाटरफाइनलमा सामनाले साविक विजेता बुद्ध युया क्लब (बिवाइसी) भोटेओडार लमजुङलाई १–० ले पराजित गर्दै अन्तिम चारमा स्थान पक्का गरेको हो ।

सामनाको जितमा पहिलो हाफमा विपिन कँडेलले गरेको गोल नै निर्णाय बन्यो । उनले खेलको १५औं मिनेटमा गोल गर्न सफल भएका थिए । सामनाका मुसा प्लेयर अफ दि म्याच घोषित भए ।

आइतबारै भएको दोस्रो क्वाटरफाइनलमा समाज कल्याण खेलकुद केन्द्रले नखिपोट युवा क्लब ललितपुरलाई पेनाल्टी सुटआउटमा ४–२ ले पराजित गर्दै अन्तिम चारमा पुग्न सफल भयो । निर्धारित समयमा १–१ गोलको बराबरी र अतिरिक्त समयमा थप गोल निस्कन नसकेपछि खेल पेनाल्टी सुटआउटमा पुगेको थियो ।

पेनाल्टीमा समाज कल्याणका एलेक्स, निशान, पुष्कर खड्का, सन्तोष श्रेष्ठले गोल गर्दा सुवास गुरुङको प्रहारलाई नखिपोटका गोलरक्षक वीरेन्द्र सारुले बचाए । नखिपोटका युवराज ढकाल र करणले मात्र गोल गर्न सफल भए । राम शाही र भरत साहको पेनाल्टीलाई समाज कल्याणका नविन सिलवालले विफल पारे ।

त्यसअघि खेलको चौथो मिनेटमा भरत साहको गोलबाट नखिपोटले अग्रता लिएको थियो । तर, नखिपोटले त्यो अग्रतालाई जोगाउन सकेन । छैटौं मिनेटमा अब्दुल्लाले गोल गर्दै खेललाई १–१ गोलको बराबरीमा ल्याए । त्यसपछि थप गोल निस्कन नसक्दा खेल अतिरिक्त समय हुँदै पेनाल्टीमा लम्बिएको थियो ।

नखिपोटका आशिष सुनार र समाजका अब्दुल्लाह रातो कार्ड खँदै मैदानबाट बाहिरिएपछि दुवै टोली १० खेलाडीमा समेटिन पुग्यो । दुवैले एक अर्कालाई हातपात गरेपछि रेफ्रीले रातो काड देखाएर मैदान बाहिर पठाए ।

यससँगै त्रिवेणी कपको सेमिफाइनल समिकरण पूरा भएको छ । अब सोमबार हुने सेमिफाइनलमा बागमती युवा क्लब र सामना तथा समाज कल्याण र रोड्स रामपुरबीच प्रतिस्पर्धा हुनेछ ।

प्रतियोगिताको विजेताले ५ लाख रुपैयाँ, त्रिवेणी कप, स्वर्णपदक र प्रमाणपत्र प्राप्त गर्नेछ । उपविजेताले ३ लाख रुपैयाँ, रजतपदक र प्रमाणपत्र पाउनेछन् । सेमिफाइनलमा पराजित दुई टोलीले समान ५० हजार प्रदान गरिने आयोजकले जनाएको छ ।

सर्वोत्कृष्ट खेलाडी र सर्वाधिक गोलकर्तालाई समान १५ हजार रुपैयाँ, स्वर्णपदक र प्रमाणपत्र प्रदान गरिने छ । लमजुङकै सर्वाधिक प्रतिष्ठित त्रिवेणी कप राष्ट्रव्यापी फुटबल प्रतियोगिता कोरोना महामारी अवधिको १ वर्ष बाहेक निरन्तरण संचालन हुँदै आएको छ ।