लमजुङ (हाम्रो खेलकुद) – साल्मे फुटबल क्लबले दोस्रो संस्करणको आरपी गुरुङ कप खुल्ला सेभेन ए साइड फुटबल प्रतियोगिताको उपाधि जितेको छ ।

परिवर्तन युवा क्लब दुधपोखरी ५ कोल्की–सिम्ले लमजुङको नव निर्मित रंगशालामा बिहीबार अवेर भएको फाइनलमा सानो काभ्रे फुटबल क्लबलाई टाइब्रेकरमा ४–१ ले पराजि तगर्दै उपाधि जित्न सफल भएको हो । निर्धारित समयमा १–१ गोलको बराबरीपछि खेल पेनाल्टीमा लम्बिएको थियो ।

त्यसअघि बिहीबारै भएको पहिलो सेमिफाइनलमा लाखाजुङलाई १–० ले हराएर सानो काभ्रेले फाइनलको यात्रा तय गरेको थियो । अर्काे सेमिफाइनलमा आयोजक सिम्लेलाई निर्धारित समयमा २–२ गोलको बराबरीपछि पेनाल्टीमा ४–१ ले पराजित गर्दै साल्मेले फाइनलको यात्रा तय गरेको थियो ।

उपाधिसँगै साल्मेले ७० हजार रुपैयाँ, आरपी कप, मेडल र प्रमाणपत्र प्राप्त गरेका छन् । दोस्रो भएको सानो काभ्रेले ३५ हजार रुपैयाँ, मेडल र प्रमाण पत्र प्राप्त गरेको क्लबका बिकास गुरुङले जानकारी गराए ।

सानो काभ्रेका राम गुरुङ प्रतियोगिताको उत्कृष्ट खेलाडी चुनिए । साल्मेका नविन गुरुङ सर्वाधिक गोलकर्ता र साल्मेकै मिजास गुरुङ उत्कृष्ट गोलरक्षक चुनिए ।

साल्मेका इन्द्र दुरु फाइनल खेलको म्यान अफ दि म्याच भए । उनीहरु सबैले समान ३ हजार रुपैया, मेडल र प्रमाणपत्र प्राप्त गरे । विजेता टोली तथा खेलाडीलाई आरपी कपको संस्थापक राम बहादुर गुरुङ र भक्त बहादुर गुरुङसँगै दुध पोखरी गाँउपालिका वडा नम्वर ५ का वडा अध्यक्ष दल बहादुर गुरुङ लगायतले पुरस्कृत गरे ।

परिवर्तन युवा क्लब दुधपोखरी ५ कोल्की–सिम्लेको आयोजनाका पुस ११ गतेबाट शुरु भएको प्रतियोगितामा १७ टोलीको सहभागिता रहेको थियो । प्रतियोगिता नकआउटको आधारमा भएको थियो ।