काठमाडौं (हाम्रो खेलकुद)– नेपाल भ्रमणमा रहेको स्पेनिस क्लब कासेरेन्यो सिपीले लगातार दोस्रो खेल जितेको छ । दशरथ रंगशालामा बिहीबार भएको मैत्रीपूर्ण खेलमा राष्ट्रिय फुटबल टोलीका पूर्व कप्तान विराज महर्जनको नेतृत्वमा रहेको काठमाडौं ११ लाई २–१ ले हराएको छ ।

अघिल्लो दिन बुधबार पोखरा रंगशालामा कासेरेन्योले राष्ट्रिय फुटबल टोलीका अर्का कप्तान अनिल गुरुङको नेतृत्व रहेकोले गण्डकी ११ लाई ३–० ले हराएको थियो । काठमाडौं ११ विरुद्ध स्पेनको चौथो श्रेणीको टोली कासेरेन्योलाई जित दिलाउन अल्भारो क्लाउस र डेभिड ग्रान्डेले समान १ गोल गरे । काठमाडौंका लागि जर्ज प्रिन्स कार्कीले एक गोल फर्काए ।

४१ औं मिनेटमा अल्भारोको गोलबाट कासेरेन्योले अग्रता लिएको थियो । डेभिडले ८२ औं मिनेटमा गोल गर्दै अन्तरलाई दोब्बर पारे । निर्धारित समय सकिन ४ मिनेट बाँकी रहँदा जर्ज प्रिन्सले गोल गर्दै अन्तरलाई घटाए ।

शान्तिका लागि फुटबल भन्ने नाराका साथ लुम्बिनी गार्डेन फाउन्डेसनले स्पेनिस टोलीलाई दुई मैत्रीपूर्ण खेलका लागि नेपाल भ्रमण गराएको थियो । फाउन्डेसनले खेलका लागि स्पेनस्थित नेपाली राजदुतावास, अखिल नेपाल फुटबल संघ, काठमाडौं जिल्ला फुटबल संघ र कास्की जिल्ला फुटबल संघसँग सहकार्य गरेको थियो ।