एजेन्सी – फिफा विश्वकप कतार २०२२ अन्तर्गत आइतबार हुने फाइनलमा अर्जेन्टिना र फ्रान्स भिड्दैछन् । खेल नेपाली समय अनुसार रातको ८:४५ बजे लुसेल रंगशालामा हुनेछ ।

फाइनलको सेरोफेरोमा अर्जेन्टिनी कप्तान लिओनेल मेस्सीले पहिलो विश्वकप उपाधि जित्ने सम्भावनाबारे सर्वत्र चर्चा छ । तर विपक्षी कप्तान ह्युगो लोरिस पनि दुर्लभ उपलब्धि हासिल गर्ने संघारमा छन् । यतिमात्र होइन, उपाधि नै जिते उनी विश्व फुटबलको इतिहासमा दुई विश्वकप जिताउने एकमात्र कप्तान बन्नेछन् ।

यसअघि तीन कप्तानले लगातार विश्वकप जित्ने अवसर पाएका थिए । तर तीनै पटक उक्त उपलब्धि पूरा भएको छैन । म्याराडोनाले सन् १९८६ र १९९० मा लगातार उपाधि जित्ने अवसर पाएपनि उनी पहिलो अवसरमा मात्र सफल भए । ब्राजिलबाट १९९४ मा डुंगाले उपाधि जित्दा कप्तानी गरेपनि १९९८ मा उनले जित्न सकेनन् । कार्ल हाइन्ज रुमिनेजेले दुवै पटक वेस्ट जर्मनीबाट फाइनल हारेका थिए ।

लोरिसले उपाधि जित्ने वा हार्ने खेलको नतिजामा भर पर्नेछ । तर उनले त्यसबाहेक पनि विश्वकपमा उपलब्धि पूरा गर्दैछन् । उनी विश्वकपमा सर्वाधिक खेल खेल्ने खेलाडी बन्दैछन् । फाइनलमा लोरिसले विश्वकपमा २० औं खेल खेल्नेछन् र म्यानुएल नोएरलाई उछिन्नेछन् ।