एजेन्सी – फिफा विश्वकप कतार २०२२ को फाइनलमा युरोपेली राष्ट्र फ्रान्सले दक्षिण अमेरिकी च्याम्पियन अर्जेन्टिनाको सामना गर्दैछ । साविक विजेता फ्रान्स र अर्जेन्टिना दुवै तेस्रो पटक उपाधि जित्ने लक्ष्यमा छन् ।

विश्वकपको पछिल्लो चार संस्करण युरोपेली राष्ट्रले जितेका छन् । सन् २०२२ मा ब्राजिलले जितेयता दक्षिण अमेरिकी टोलीले विश्वकप उपाधि जित्न सकेका छैनन् । सन् २०१४ मा अर्जेन्टिना फाइनलमा जर्मनीसँग पराजित हुँदै उपाधिबाट बन्चित हुनु परेको थियो । समग्रमा विश्वकपको फाइनलमा भने दक्षिण अमेरिकी टोली युरोपमाथि हावी भएको इतिहास छ ।

हालसम्म २१ संस्करण सम्पन्न हुँदा युरोपले १२ पटक र दक्षिण अमेरिकाले ९ पटकक विश्वकप जितेका छन् । उरुग्वेले सन् १९३० र १९५० मा विश्वकप जित्दा दक्षिण अमेरिकी प्रतिद्वन्द्वीलाई पराजित गरेको थियो । त्यसबाहेक ब्राजिलले ५ पटक र अर्जेन्टिनाले २ पटक विश्वकप जित्दा युरोपेली प्रतिद्वन्द्वीलाई नै हराएको इतिहास छ । यता युरोपेली टोलीले हालसम्म ३ पटक मात्र दक्षिण अमेरिकी टोलीलाई फाइनलमा हराएका छन् ।

हालसम्म १० पटक युरोप र दक्षिण अमेरिकाले फाइनल खेल्दा ७ पटक दक्षिण अमेरिकी टोलीले विश्वकप जितेका छन् । ब्राजिलले आफ्नो ५ उपाधि जित्ने क्रममा सन् १९५८ मा स्विडेन, १९६२ मा चेकोस्लोभाकिया, १९७० र १९९४ मा इटाली र २००२ मा जर्मनीलाई हराएको थियो । अर्जेन्टिनाले सन् १९७८ मा नेदरल्यान्ड्स र १९८६ मा वेस्ट जर्मनीलाई पराजित गरेको थियो ।

युरोपेली राष्ट्रले दक्षिण अमेरिकी राष्ट्र हराएको १९९० मा वेस्ट जर्मनीले अर्जेन्टिना, १९९८ मा फ्रान्सले ब्राजिल र २०१४ मा जर्मनीले अर्जेन्टिना नै हो । अर्जेन्टिनाले हालसम्म ५ फाइनलमा २ जित र ३ हारको नतिजा निकालेको छ । फ्रान्सले ३ पटकमा २ जित र १ हार बेहोरेको छ । अर्जेन्टिना छैटौं र फ्रान्स चौथो पटक फाइनल खेल्दैछन् ।