एजेन्सी – फिफा विश्वकप कतार २०२२ अन्तर्गत तेस्रो स्थानको खेलमा क्रोएसियासँग पराजित भएपछि मोरक्कोका डिफेन्डर अक्रफ हाकिमीले खेलका रेफ्रीसँगै फिफा अध्यक्ष जियानी इन्फान्टिनोविरुद्ध आक्रामक रुपमा प्रस्तुत भए ।

कतारी रेफ्री अब्दुलरहमान अल-जसिमले फाइनल ह्विसल बजाए लगत्तै मोरक्कोका खेलाडी रेफ्रीविरुद्ध जाइलागेका थिए । डिफेन्डर अक्रफ हकिमीलाई रोक्न मोरक्कोकै खेलाडीलाई हम्मेहम्मे परेको थियो । खेलका दौरान रेफ्रीले पेनाल्टी नदिएको भन्दै मोरक्कोका खेलाडीले आफ्नो निराशालाई आक्रोशित रुपमा पोखेका थिए ।

पेनाल्टी क्षेत्रभित्र ब्रुनो पेक्टोभिचले ह्यान्ड बल गरेको भन्दै मोरक्कोका खेलाडीले पेनाल्टी मागेका थिए । तर भिडियो असिस्टेन्ट रेफ्रीले हेर्दा उक्त बल पेक्टोभिचको ढाडमा लागेको देखिएको थियो । त्यस्तै एक फलमा पहेंलो कार्ड नदिएको विषयमा पनि मोरक्कोका खेलाडी रिसाएका थिए ।

खेल सकिएपछि क्रोएसियाले तेस्रो स्थानको पदक पाउँदा मोरक्कोका खेलाडी विरोध जनाउँदै मैदान छाडेका थिए । क्रोएसियाले पदक लिँदा मोरक्कोको टोली ड्रेसिङ रुम पसेको थियो । हाकिमीले ड्रेसिङ रुम फर्कने क्रममा अध्यक्ष इन्फान्टिनोसँग पनि आक्रोशित रुपमा प्रस्तुत भएका थिए । फिफाले मोरक्कोलाई पदक दिन नचाहेको र लगातार दोस्रो खेलमा रेफ्रीले आफू विरुद्ध निर्णय दिएकोमा हाकिमीले निराशा पोखेका थिए ।

हाकिमीले इन्फान्टिनोसँग आक्रोश पोख्दा त्यहाँभित्र फिफा अन्तर्गतको टिभी क्यामेरा र फोटोग्राफर मात्र थिए । ड्रेसिङ रुम पस्ने स्थानमा रहेकाले अन्य सार्वजनिक मिडिया उपस्थित थिएनन् । फिफाले तुरुन्त उक्त भिडियो डिलिट गर्न लगाएको बुझिएको छ ।

हाकिमीले ड्रेसिङ रुम छाडेर टिम बसमा जाने समयमा अन्तर्वार्ताका क्रममा आफूले गल्ती गरेको स्वीकारे । ‘खासै केहि होइन । म रेफ्रीको निर्णयले रिसाएको थिएँ । म अध्यक्ष इन्फान्टिनोसँग आफ्नो कुरा राख्न चाहन्थे । तर म उनलाई प्रयोग गरेको शब्दप्रति माफी चाहन्छु । उनी मेरो साथी हुन् र मेरो सम्मान छ । त्यस्तो केहि भएको छैन,’ हाकिमीले भने ।