एजेन्सी – फिफा विश्वकप कतार २०२२ अन्तर्गत आइतबार अर्जेन्टिना र फ्रान्सबीच फाइनल खेल हुँदैछ । तर फाइनल खेल सम्पन्न हुनुअघि नै युरोपका पाँच क्लबमा विश्वकप विजेता खेलाडी रहने पक्का भएको छ ।

फ्रान्स र अर्जेन्टिना दुवै राष्ट्रमा रहेका खेलाडी युरोपको शीर्ष डिभिजन लिग खेल्दै आएका छन् । यसपटक २६ सदस्यीय टोली हुँदा त्यो संख्या विगतभन्दा बढ्दो छ । अझ यसपटक फाइनल खेल नहुँदै पाँच क्लबले विश्वकप विजेता खेलाडी प्रतिनिधित्व गर्ने पक्का भइसकेको छ । कारण दुवै राष्ट्रमा उक्त क्लबका कम्तिमा एक खेलाडी छन् ।

पेरिस सेन्ट जर्मेन (फ्रान्स) – पिएसजीबाट यसपटक दुई खेलाडीले विश्वकप फाइनल खेल्दैछन् । अर्जेन्टिनाका कप्तान लिओनेल मेस्सी र फ्रान्सका फरवार्ड किलीयन एमबाप्पेले फाइनलमा विश्वकप उपाधि मात्र नभएर गोल्डेन बुटका लागि पनि प्रतिस्पर्धा गर्नेछन् । हाल समान ५-५ गोल भएपनि असिस्टको आधारमा मेस्सी अघि छन् ।

टोटेनहम हट्सपर (इंग्ल्यान्ड) – टोटेनहमबाट पनि दुई खेलाडी नै फाइनलमा एक आपसमा भिड्दैछन् । क्लबको समेत नेतृत्व गरिरहेका फ्रान्सका कप्तान ह्युगो लोरिस दोस्रो पटक उपाधि उचाल्ने लक्ष्यमा छन् । त्यस्तै अर्जेन्टिनी डिफेन्डर क्रिस्टियन रोमेरो यसपटक आफ्नो क्लब कप्तानलाई असफल पार्ने प्रयासमा हुनेछन् ।

म्यानचेस्टर युनाइटेड (इंग्ल्यान्ड) : युनाइटेडका लागि पछिल्लो समय डिफेन्स सम्हालिरहेका दुवै सेन्टर डिफेन्डर यसपटक विश्वकप फाइनलमा आमने-सामने हुनेछन् । फ्रान्सका राफाएल भारान र अर्जेन्टिनाका लिसान्द्रो मार्टिनेजमध्य एक क्यारिंगटन फर्कंदा विश्वकप विजेता हुनेछन् ।

एटलेटिको म्याड्रिड : फ्रान्सका एन्टोइन ग्रिज्मन र अर्जेन्टिनाका रोड्रीगो डे पल दुवै मिडफिल्डमा जमेका छन् ।

युभेन्टस : अर्जेन्टिनी विंगर एन्जल डी मारिया र फ्रान्सका मिडफिल्डर एड्रिएन राबीओट मध्य एक टुरिन फर्कंदा विश्वकप विजेता बन्नेछन् ।