एजेन्सी – अर्जेन्टिनाका कप्तान लियोनल मेस्सीले कतारमा जारी फिफा विश्वकप २०२२ को फाइनल खेल नै आफ्नो अन्तिम विश्वकप खेल हुने बताएका छन् ।

मंगलबार राति साविकको उपविजेता क्रोएसियालाई ३–० ले पराजित गरेसँगै मेस्सीले फाइनल खेल नै आफ्नो विश्वकपको अन्तिम खेल हुने बताएका हुन् । अर्को विश्वकप आउन चार वर्ष बाँकी रहेको र त्यतिबेला आफूले अहिलेजस्तै खेल्न सक्छुजस्तो नलागेको मेस्सीले उल्लेख गरेका छन् ।

३५ वर्षीय मेस्सीकै उच्च प्रदर्शनमा अर्जेन्टिनाले क्रोएसियालाई ३–० ले हराएको थियो । उक्त खेलमा मेस्सीले एक गोलसँगै अर्काे गोलको लागि असिस्ट प्रदान गरेका थिए । मेस्सीले यस विश्वकपमा ५ खेलमा ५ गोल र ३ असिस्ट प्रदान गरेका छन् । उनी गोल्डेन बुटको दौडमा फ्रान्सका केलियन एमबाप्पेसँग संयुक्त रुपमा शीर्षस्थानमा रहेका छन् ।

‘म यो फाइनल खेलेर मेरो विश्वकप यात्रा समाप्त गर्न सक्षम भएकोमा गर्व गर्दछु । मैले के गरिरहेको छु भने, आइतबार मेरो खेल हुनेछ । विश्वकपमा अन्तिम खेल नै हुनेछ । म २०२६ लाई कुर्न सक्दिन । त्यसैले म आशा गर्छु कि म उत्कृष्ट तरिकाले समाप्त गर्न सक्छु ।’ मेस्सीले भने, ‘आफ्नो टोलीले ‘धेरै राम्रो खेलिरहेको छ । निक्कै राम्रो भइरहेको छ । बलियो र धेरै रमाइलो महसुस भइरहेको छ ।’

अर्जेन्टिनाले सन् १९८६ पछि विश्वकपको उपाधि जित्न सकेको छैन । २०१४ मा उपाधिनजिक पुगेपनि टोली जर्मनीसँग अतिरिक्त समयमा १–० ले पराजित भएको थियो । बुधबार राती हुने मोरक्को र फ्रान्सको विजेतासँग अर्जेन्टिनाले आइतबार उपाधिका लागि प्रतिस्पर्धा गर्नेछ ।