एजेन्सी – फ्रान्सको पुरुष राष्ट्रिय फुटबलको टोलीको मुख्य प्रशिक्षकमा अझै दुई वर्ष डिडियर डेसच्याम्प्स नै रहने भएका छन् ।

फ्रान्स फुटबल फेडेरेसन (एफएफएफ) ले डेसच्याम्प्स नै सन् २०२४ सम्म टोलीको मुख्य प्रशिक्षकमा रहने बताएका छन् ।यससँगै फ्रान्सले सन् २०२४ को युरोकप डेसच्याम्प्सकै प्रशिक्षणमा खेल्नेछन् ।

फ्रान्सको मुख्य प्रशिक्षक बन्ने दौडमा फ्रान्सकै लेजेन्ड जिनेदिन जिदान रहेका छन् । तर, एफएफएफका अध्यक्ष नोएल ले ग्रेटले डेसच्याम्प्सलाई नै निरन्तरता दिएका हुन् ।

५४ वर्षीय डेसच्याम्प्स ८ जुलाई २०१२ देखि फ्रान्सको मुख्य प्रशिक्षक रहेका छन् । उनको प्रशिक्षणमा फ्रान्सले १३७ खेल खेल्दा ८८ जित, २७ बराबरी र २२ हारको नतिजा निकालेको छ । यसक्रममा उनकै प्रशिक्षणमा फ्रान्सले सन् २०१८ को विश्वकप र २०२०–२१ को युइएइफए नेसन्स लिग जितेका छन् । सन् २०१६ को युरोकपमा उपविजेता बनेको छ ।

अब दोहामा जस्तोसुकै नतिजा आएपनि उनी नै अझै दुई वर्ष अर्थात सन् २०२४ को युरोकपसम्म उनी नै प्रशिक्षक हुन सक्छन् । डेसच्याम्प्सको प्रशिक्षणमा फ्रान्सले जित्न नसकेको उपाधि युरो कप नै हो । त्यसैले एफएफएफ उनलाई नै जिम्मेवारी दिन चहान्छ । सन् २०१६ मा घरेलु भुमिमा फ्रान्स पोर्चुगलसँग पराजित हुँदै युरो कप जित्नबाट वञ्चित बनेको थियो ।

क्वाटरफाइनलमा इंग्ल्यान्डलाई हराएपछि डेसच्याम्प्सको सम्झौता नविकरण भएको बुझिएको छ । क्वाटरफाइनलबाट बाहिरिएको भए एफएफएफ डेसच्याम्प्सलाई हटाएर जिदानलाई मुख्य प्रशिक्षक बनाउने तयारी गरिरहेको थियो । इङ्ल्यान्डविरुद्धको जितपछि पत्रकार सम्मेलनमा डेसच्याम्प्सले हरेक कुरा आ–आफ्नो समयमा हुने बताएका थिए ।

‘हाम्रो अध्यक्षले तोकेका लक्ष्यहरू हासिल गर्न पाउनु ठूलो कुरा हो । उहाँ खुसी हुनुहुन्छ र मैले कल्पना गरेको धेरै व्यक्तिहरू फ्रान्समा खुसी छन् ।’ डेसच्याम्प्सले भने, ‘हामीले जे हासिल गरेका छौं त्यसको आनन्द लिनुपर्छ । अर्थात् फेरि चार उत्कृष्ट टोली हुन पाउनु खुशीको कुरा हो । अब म बुधवारको खेल (मोरक्को) विरुद्धको बारे सोच्दै छु, अरु केहि छैन ।’