एजेन्सी – कतारमा जारी फिफा विश्वकप २०२२ को सेमिफाइनलको समिकरण पूरा भइसकेको छ । ६४ मध्ये ६० खेल समाप्त भइसक्दा अब अन्तिम ४ खेलमा प्रतिस्पर्धा हुन बाँकी छ ।

अब ४ खेल मात्रै बाँकी हुँदा गोल्डेन बुटको दौड पनि रोमाञ्चक बनेको छ । फ्रान्सका फरवार्ड केलियन एमबाप्पे गोल्डेन बुट जित्ने दौडमा सबैभन्दा अघि रहँदा उनलाई आफ्नै टोलीका फरवार्ड ओलिभर जिरुड र अर्जेन्टिनाका कप्तान लियोनेल मेस्सीले पछ्याइरहेका छन् ।

यस दौडबाट इक्वेडरका कप्तान एनर भ्यालेन्सिया, स्पेनका अल्भारो मोराटा, ब्राजिलका रिचार्लीसन, इंग्ल्यान्डका बुकायो साका र मार्कस रासफर्ड, नेदरल्यान्ड्सका कोडी गाक्पो र पोर्चुगलका गोन्कालो रामोस बाहिरिसकेका छन् । उनीहरुले समान ३ गाेल गरेका थिए ।

हालसम्म ६० खेलमा १५८ गोल भएको छ । एमबाप्पेले ५, मेस्सी र जिरुडले समान ४ गोल गरेको छ । ७ खेलाडीेले ३ गोल, २१ खेलाडीले २ गोल, ८० खेलाडीले १ गोल र २ आत्मघाती गोल भएको छ ।

विश्वकपमा बढी गोल गर्ने खेलाडीलाई यो गोल्डेन बुट प्रदान गरिन्छ । दुई खेलाडीको गोल बराबर भएमा त्यसमा असिस्ट गर्ने छानिन्छ । त्यसमा पनि बराबरी भएको अवस्थामा कम समय खेल्नेलाई यो अवार्ड प्रदान गरिने प्रावधान छ । कतार विश्वकपको गोल्डेन बुटको दौडमा को अघि छन् त हेरौं ।

केलियन एमबाप्पे (फ्रान्स)
२३ वर्षीय केलियन एमबाप्पे यस विश्वकपमा ५ गोल र २ असिस्टसहित सर्वाधिक गोलकर्ताको सुचीमा शीर्षस्थानमा रहेका छन् । फ्रान्सले सेमिफाइनल सम्मको यात्रा तय गर्दा फ्रान्सले ११ गोल गर्दा उनी ७ गोलमा प्रत्यक्ष रुपमा संलग्न छ । उनले क्वाटरफाइनलमा इंग्ल्यान्डसँग र समुह चरणमा ट्युनिसियासँग गोल गर्न सकेनन् ।

दोस्रो विश्वकप खेलिरहेका उनी विश्वकपमा सर्वाधिक गोलकर्ता बन्ने सम्भावना पनि छ । त्यसका लागि उनले अब ८ गोल गर्नुपर्ने हुन्छ । दुई विश्वकपमा ९ गोल गरिसकेका उनले थप गोल गर्न सक्ने क्षमता राख्दछन् । फ्रान्स सेमफिाइनलमा पुगिसकेको छ । फाइनलमा पुगेको अवस्थामा उनले आफ्नो गोलसङ्ख्या बढाएर सर्वाधिक गोलकर्ता बन्दै गोल्डेन बुट जित्न चहान्छन् । तर एमबाप्पेले आँफु गोल्डेन बुट भन्दा पनि विश्वकप जित्न आएको बताएका छन् ।

ओलिभर जिरुड (फ्रान्स)
गोल्डेन बुटको दौडमा एमबाप्पेलाई पछ्याइरहेका भेट्रान फरवार्ड ओलिभर जिरुड फ्रान्सका सर्वाधिक गोलकर्ता हुन् । उनले यसै विश्वकपमा ४ गोल गर्दै लेजेन्ड थिएरी हेनरीको ५१ गोलको कीर्तिमानलाई भंग गर्दै आफ्नो नाममा लेखाइसकेका छन् ।

अष्ट्रेलियाविरुद्धको पहिलो खेलमा दुई गोल गरेका ३६ वर्षीय जिरुडले त्यसपछि डेनमार्क र ट्युनिसियाविरुद्धको खेलमा भने गोल गर्न सकेनन् । प्रि–क्वाटरफाइनलमा पोल्यान्डमाथि ३–१ को जित निकालेको खेलमा उनले एक गोल गरे । ३६ वर्षीय जिरुडले क्वाटरफाइनलमा इंग्ल्यान्डमाथि २–१ को जित निकालेको खेलमा विजयी गोल गरेका थिए । उनले असिस्ट भने दिएका छैनन् ।

लियोनेल मेस्सी (अर्जेन्टिना)
अर्जेन्टिनी कप्तान लियोनेल मेस्सीले ५ खेलमा ४ गोल र २ असिस्ट गर्दै गोल्डेन बुट जित्ने आशा जीवितै राखेको छ । कप्तान लियोनेल मेस्सी अर्जेन्टिनाको महत्वपूर्ण खेलाडी हुन् । उनकै उच्च प्रदर्शनमा अर्जेन्टिनाले सेमिफाइनसम्मको यात्रा तय गरिसकेको छ । उनी यस विश्वकपमा ५ खेलबाट ४ गोल र २ असिस्ट दिएर सर्वाधिक गोलकर्ताको सुचीमा संयुक्त रुपमा दोस्रो स्थानमा रहँदा गोल्डेन बुटको दावेदारको रुपमा रहेको छ ।

३५ वर्षीय मेस्सीले साउदी अरेबियासँग २–१ ले पराजित भएको खेलमा १ गोल गरेका थिए । मेक्सिकोविरुद्ध उनले एक गोल र असिस्ट प्रदान गरे । पोल्यान्डविरुद्ध गोल गर्न नसकेका उनले अष्ट्रेलियाविरुद्ध एक गोल गरे । क्वाटरफाइनलमा नेदरल्यान्ड्सलाई टाइब्रेकरमा ४–३ ले पराजित गरेको खेलमा उनले निर्धारित समयमा एक गोल र एक असिस्ट दिएका थिए । ४ मध्ये उनको २ गोल पेनाल्टीमा रहेको छ । पाँच विश्वकप खेलेका उनले विश्वकपमा आफ्नो गोलसंख्या १० पु¥याएको छ ।