एजेन्सी – अर्जेन्टिनी कप्तान लिओनेल मेस्सीले फिफा विश्वकप कतार २०२२ को सेमिफाइनलमा प्रवेश गरेसँगै आफ्नो टोलीलाई पूर्व कप्तान डिएगो म्याराडोनाले स्वर्गबाट हेरिरहेको अभिव्यक्ति दिएका छन् ।

शुक्रबार सम्पन्न क्वाटरफाइनलमा नेदरल्यान्ड्सलाई टाइब्रेकरमा पराजित गर्दै अर्जेन्टिनाले अन्तिम चारमा स्थान सुरक्षित गरेको हो । एक समय खेलमा २-० ले अघि बढेको अर्जेन्टिनाले अन्त्यतिर लगातार दुई गोल खाएपछि खेल अतिरिक्त समय हुँदै टाइब्रेकरसम्म पुगेको थियो ।

कप्तान मेस्सीले डच टोलीविरुद्ध खेल निकै कठिन भएको बताए । ‘खेल निकै कठिन थियो । खेलको सुरुवातदेखि नै हामीलाई गाह्रो थियो । हामीले जुन परिस्थितिको सामना गर्नुपर्यो, त्यो अवस्था आउनुपर्ने नै थिएन । हामी दुई गोलले अघि थियौं । तर डच टोलीले रणनीति बदलेर हामीलाई लगातार दबाबमा राख्यो,’ उनले भने ।

‘दोस्रो हाफमा नेदरल्यान्ड्सले लामो पास खेल्दै हाम्रो पेनाल्टी क्षेत्रमा धेरै खेलाडी राखेर खेलमा फर्कन सफल भयो । उनीहरुले खेल बराबर गरेपछि हामीलाई निकै कठिनाई सामना गर्नुपर्यो । तर अन्त्यमा हामी सेमिफाइनलमा पुग्न सक्यौं ।’

‘जब लौटारोले अन्तिम पेनाल्टीमा गोल गरे र हामी अघि बढ्यौं, त्यो एकदम हर्षको क्षण थियो । हामी ठूलो दबाबबाट मुक्त भएका थियौं । यो खेल निकै कठिन थियो र सुरुवातदेखि हामी यसको लागि तयार थियौं ।’

मेस्सीले पूर्वकप्तान म्याराडोनाले आफ्नो टिमलाई स्वर्गबाट हेरिरहेको बताए । ‘डिएगोले हामीलाई स्वर्गबाट हेरिरहेका छन् । उनले हामीलाई हौसला दिइरहेका छन् र आशा छ अन्त्यसम्म यो कायम रहनेछ,’ उनले थपे ।

अर्जेन्टिनाले अब मंगलबार हुने सेमिफाइनलमा क्रोएसियाको सामना गर्नेछ । उक्त खेलका लागि डिफेन्डरद्वय मार्कस अकुना र गोन्जालो मोन्टिएल उपलब्ध हुने छैनन् । दुवै खेलाडी दोस्रो पहेंलो कार्डका कारण बाहिर रहने भएका हुन् ।