एजेन्सी – फिफा विश्वकप कतार २०२२ अन्तर्गत तेस्रो क्वाटरफाइनलमा मोरक्को र पोर्चुगल भिड्दैछन् । खेल नेपाली समय अनुसार रातको ८:४५ बजे सुरु हुनेछ ।

अन्तिम १६ को खेलमा स्पेनलाई टाइब्रेकरमा पाखा लगाउँदै मोरक्को क्वाटरफाइनलमा स्थान बनाउन सफल भएको थियो । यता पोर्चुगल भने युरोपेली टोली स्विटजरल्यान्डविरुद्ध गोलको वर्षा गर्दै अन्तिम ८ मा प्रवेश गरेको थियो । मोरक्को पहिलो पटक क्वाटरफाइनलमा पुगेको इतिहासलाई थप अविस्मरणीय बनाउन चाहन्छ । आजको खेल जित्दै सेमिफाइनलमा प्रवेश गरे, यो उपलब्धि हासिल गर्ने मोरक्को पहिलो अफ्रिकी राष्ट्र बन्नेछ ।

यसअघि मोरक्को र पोर्चुगलले विश्वकपमा दुई पटक खेलेका छन् । सन् १९८६ मा मोरक्कोले ३-१ को जित दर्ता गरेको थियो । त्यस्तै सन् २०१८ मा भने क्रिस्टियानो रोनाल्डोको हेडर गोलमा पोर्चुगल १-० ले विजयी भएको थियो । आजको खेलमा रोनाल्डोले सुरुवात गर्ने सम्भावना निकै कम छ ।

पछिल्लो खेलमा ह्याट्रिक गरेका फरवार्ड गोन्कालो रामोसले टोलीमा स्थान निरन्तर राख्ने सम्भावना छ । अन्तर्राष्ट्रिय फुटबलमा पहिलो पटक सुरुवाती रोजाइमा खेल्दा नै ह्याट्रिक गरेका उनले विश्वकपमा चार गोल गरिसकेका छन् ।

मोरक्कोले यसपटक रक्षात्मक रुपमा निकै राम्रो प्रदर्शन गरेको छ । हालसम्म युरोपेली राष्ट्रविरुद्ध तीन खेल खेल्दा कुनैमा गोल खाएको छैन । पोर्चुगलले यसअघि खेलेका विश्वकपको दुवै क्वाटरफाइनल खेलमा जित हासिल गरेको इतिहास छ ।

फिफा विश्वकपमा अफ्रिकी राष्ट्र सहभागी भएको १३ नकआउट खेलमध्य ९ खेल अतिरिक्त समयमा पुगेको छ । मोरक्कोले यस प्रतियोगिताको ४ खेलमा जम्मा एक गोल खाएको छ, त्यो पनि आत्मघाती गोल थियो । यता पोर्चुगलले भने विश्वकपको पछिल्लो १० खेलमा लगातार गोल गरेको छ ।