काठमाडौं (हाम्रो खेलकुद)– अखिल नेपाल फुटबल खेलाडी संघले पछिल्लो समय देखिएको अन्योल्यतालाई सुल्झाउँदै घरेलु फुटबल यथाशीघ्र संचालनका लागि वातावरण तयार पार्न अभिभावक संस्था अखिल नेपाल फुटबल संघ (एन्फा) को ध्यानाकर्षण गराएको छ ।

एन्फाले सहिद स्मारक ए डिभिजन लिगको तयारीका लागि प्रतिबद्धता जनाएअनुसार तयारी रकम उपलब्ध नगराएपछि लिग निर्धारित समयमा सुरु हुनेमा शंका उत्पन्न भएको छ । पटक पटक रकम उपलब्ध गराउने प्रतिबद्धता गरेपनि एन्फाले तयारी रकम उपलब्ध नगराएको भन्दै १४ मध्ये ९ ए डिभिजन लिग क्लबले आइतबार एन्फालाई ध्यानाकर्षण पत्र बुझाएका थिए ।

सोही पत्रमा एन्फाले रकम उपलब्ध गराएको ३ महिनापछि मात्र लिग खेल्न सकिने उल्लेख गरेका छन् । जबकी एन्फा र क्लबले संयुक्त बैठकबाट पुस २६ गतेबाट सहिद स्मारक ए डिभिजन लिग सुरु गर्ने निर्णय भएको थियो । पछिल्लो घटना क्रमले लिग पूर्वनिर्धारित सयममा हुनेमा शंका उत्पन्न भएको छ ।

यस्तो पृष्ठभूमीमा खेलाडी संघले एन्फा र क्लबहरु बिचको असमझदारीका कारण फेरि पनि तोकिएको समयमा लिग हुने वा नहुने अन्योलता बढ्नु गम्भिर विषय भएको जनाएको छ । संघले यस्ता विषयलाई समयमा नै सुल्झाई घरेलु फुटबल यथा सिघ्र संचालन गर्ने वातावरण सृजना गर्न पनि एन्फालाई अनुरोध गर्दछौं ।

खेलाडी संघका अध्यक्ष विक्रम लामाको नेतृत्वमा लामाको नेतृत्वमा गएको खेलाडी संघको टोलीले बुधबार एन्फा अध्यक्ष पंकज विक्रम नेम्बाङलाई पत्र हस्तान्तरण गरेका थिए । पत्रमा भनिएको छ,‘ घरेलु फुटबल संचालन नहुँदा खेलकर्मीहरुलाई मात्र असर पर्ने नभई पूर्ण रुपमा देशको फुटबलको अवस्थालाई नै गम्भिर असर पर्ने हुँदा यस्ता आपसी असमझदारीहरुलाई सुल्झाई वा विकल्प सहित भए पनि घरेलु फुटबल सुचारु गर्न गम्भिरता पूर्वक अनुरोध सहित ध्यानाकर्षण गर्दछौं ।’

एन्फाले गत वर्ष वर्षको बाँकी ७ लाख ५० हजार र यो वर्षको तयारीको ५० प्रतिशत १५ लाख रुपैयाँ उपलब्ध गराउने प्रतिबद्धता पूरा गर्न सकेन । एन्फाले पहिलो पटक कात्तिक १४ गते, त्यसपछि कात्तिक २१ गते र पछिल्लो पटक मंसिर १५ गते सम्म रकम उपलब्ध गराउने प्रतिबद्धता गरेको क्लबहरुले एन्फाले बुझाएको पत्रमा उल्लेख छ ।