एजेन्सी – पोर्चुगलका भेट्रान डिफेन्डर पेपेले विश्वकप फुटबलमा आफ्नै टोलीका कप्तान क्रिष्टियानो रोनाल्डोको कीर्तिमान तोडेका छन् ।

मंगलबार राति प्रि–क्वाटरफाइनलमा स्वीट्जरल्यान्डविरुद्ध ६–१ को जित निकालेको खेलमा एक गोल गरेपछि उनी विश्वकप फुटबलको इतिहासमा गोल गर्ने दोस्रो पाका (जेठा) खेलाडी बनेका छन् ।

यसै विश्वकपमा पोर्चुगलकै कप्तान क्रिस्टियानो रोनाल्डोले घानाविरुद्ध जित निकालेको खेलमा गोल गर्दै दोस्रो पाका खेलाडी बनेका थिए । त्यो कीर्तिमानलाई पेपेले तोडेका हुन् । पेपेले ३९ वर्ष २८३ दिनको उमेरमा गोल गरेर कीर्तिमान बनाएका हुन् ।

पेपेले ३३औं मिनेटमा हेडिङमार्फत् शानदार गोल गरेर टिमको अग्रता दोब्बर पारेका थिए । कर्नरबाट आएको बललाई ब्रुनो फर्नान्डेजले मिलाइदिएको पासमा बक्सअघि रहेका पेपेले शानदार हेडिङ गोल गरेका थिए । त्यही गोलले पेपेले कीर्तिमान बनाएको हो ।

पेपेभन्दा अघि क्यामरुनका रोजर मिल्ला छन् । उनले सन् १९९४ को विश्वकपमा रसियाविरुद्ध ४२ वर्ष ३९ दिनको उमेरमा गोल गरेका थिए । नियमित कप्तान क्रिष्टियानो रोनाल्डो बेञ्चमा रहँदा उनले नै स्वीट्जरल्यान्डविरुद्ध कप्तानीको भुमिका निभाएका थिए । पेपेको गोल र कीर्तिमानबारे फिफाले पनि आफ्नो वेबसाइटमा चर्चा गरेको छ ।

सन् २००७ बाट पोर्चुगलको सिनियर टोलीबाट खेलेका उनले हालसम्म १३२ क्याप जित्दा ८ अन्तर्राष्ट्रिय गोल गरेका छन् । क्लब फुटबलमा स्पेनिस क्लब रियल म्याड्रिडमा लामो समय बिताएका उनी अहिले आफ्नै देशकै क्लब एफसी पोर्टाेका लागि खेलिरहेका छन् ।

पेपेका लागि यो अन्तिम विश्वकप र अन्तिम अन्तर्राष्ट्रिया प्रतियोगिता रहनेमा शंका छैन । तर, ३९ वर्ष पुगिसक्दा पनि उनको गज्जवको प्रदर्शनले उनले अझै पनि ठुला प्रतियोगिता खेल्ने समभावना देखाएको छ । अब पोर्चुगलले क्वाटरफाइनलमा मोरक्कोसँग खेल्नेछ ।