कतार (हाम्रो खेलकुद) – उपाधि दावेदार ब्राजिलले फिफा विश्वकप कतार २०२२ अन्तर्गत अन्तिम १६ को खेलमा दक्षिण कोरियाविरुद्ध पहिलो हाफमै ४ गोल गरेको छ ।

खेलको सुरुवातदेखि नै आक्रामक देखिएको ब्राजिलले प्राप्त अवसर सदुपयोग गर्दै फराकिलो अग्रता बनाएको हो । बल पोसेसनमा बलियो पकड जमाउँदै आक्रमण बुनेको ब्राजिलले लगातार आक्रमणमा अवसर सिर्जना गरिरहेको छ । कोरियाले पाएको न्यून अवसरमा गोलरक्षक एलिसनलाई दुख दिएपनि गोल फर्काएको छैन ।

खेलको सातौं मिनेटमा ब्राजिलले भिनीसियस जुनिअरको गोलमा अग्रता लिएको थियो । पेनाल्टी क्षेत्रभित्र आएको बललाई उनले नियन्त्रणमा राख्दै संयमित फिनिस गरे । उनले बायाँ भागबाट गरेको प्रहारमा कोरियाली डिफेन्स र गोलरक्षक बिट भएका थिए ।

१३ औं मिनेटमा नेयमारले पेनाल्टीमा गोल गरे । पेनाल्टी क्षेत्रभित्र रिचार्लीसनलाई लडाएपछि रेफ्रीले पेनाल्टी दिएका थिए । २९ औं मिनेटमा रिचार्लीसनले ब्राजिललाई ३ गोलले अघि राखे । उनी आफैंले पेनाल्टी क्षेत्र बाहिर उत्कृष्ट बल नियन्त्रण गर्दै सुरु गरेको मुभ अन्त्यमा फिनिस गरेका थिए । थियागो सिल्भाले दिएको अन्तिम पासलाई उनले सहजै फिनिस गरेका थिए ।

३६ औं मिनेटमा ब्राजिलले चौथो गोल थप्यो । भिनिसियस जुनिअरको पासमा लुकास पाक्वेटाले गोल गरे । पेनाल्टी क्षेत्र भित्रबाट उनले गरेको पहिलो टचको प्रहार गोलरक्षक र डिफेन्स पार हुँदै गोल भएको थियो । इन्ज्युरी समयमा पाक्वेटाकै प्रहार गोलरक्षक किम सुङयुले विफल पारे ।

यस खेलको विजेताले क्वाटरफाइनलमा क्रोएसियाको सामना गर्नेछ । आजै भएको अन्तिम १६ को खेलमा क्रोएसियाले जापानलाई हराएको थियो । १-१ को बराबरीपछि टाइब्रेकरमा पुगेको खेलमा क्रोएसिया ३-१ ले विजयी भएको थियो ।