काठमाडौं (हाम्रो खेलकुद)– अखिल नेपाल फुटबल संघ (एन्फा) ले पुस २६ गतेबाट सुरु गर्ने भनिएको सहिद स्मारक ए डिभिजन लिग निर्धारित समयमा सुरु हुनेमा शंका देखिएको छ । एन्फाले क्लबहरुसँग गरेको तयारी गर्ने उपलब्ध गराउने पटक पटकको प्रतिबद्धता पूरा नभएकाले निर्धारित समयमा लिग हुनेमा शंका बढेको हो ।

ए डिभिजन लिगका १४ मध्ये ९ क्लबका प्रतिनिधिले आइतबार एन्फा अध्यक्षलाई पत्र लेख्दै तयारी वापतको रकम उपलब्ध भएको तीन महिनापछि मात्र लिग खेल्न तयार रहेको भन्दै संयुक्त रुपमा ध्यानाकर्षण पत्र बुझाएका छन् । संयुक्त ध्यानाकषर्णमा भनिएको छ सहभागी क्लब र एन्फा पदाधिकारीबीच औपचारिक छलफल भएको अघिल्लो वर्षको तयारीको अन्तिम र यो वर्षको तयारी खर्चको ५० प्रतिशत रकम दिने सहमति कात्तिक १४ गते भएको थियो ।

एन्फाले कात्तिक १४ गते, त्यसपछि कात्तिक २१ गते र पछिल्ले पटक मंसिर १५ गते रकम उपलब्ध गराउने प्रतिबद्धता गरेको पत्रमा उल्लेख छ । तर मंसिर १६ गते सम्म पनि प्रतिबद्धता अनुसार रकम उपलब्ध नभएकोले रकम पाएको ३ महिनापछि मात्र लिग खेल्न तयार हुने पत्रमा उल्लेख गरिएको छ ।

विगतमा भै पटक पटक झुटो आश्वासन मात्र बारम्बार दिने प्रवृत्तिले गर्दा एन्फा को यस्ता खालका गतिविधिले कतै सहिद स्मारक ‘ए’ डिभिजन लिग नै अन्यौलमा पर्ने होकी भन्ने पनि हामीलाई चिन्ताको विषय भएको हुनाले सो सम्बन्धमा समेत गम्भिर ध्यानाकर्षण गराउन चाहन्छौं, संयुक्त ध्यानाकर्षण पत्रमा भनिएको छ ।

एन्फाले गत वर्ष वर्षको बाँकी ७ लाख ५० हजार र यो वर्षको तयारीको ५० प्रतिशत १५ लाख रुपैयाँ उपलब्ध गराउने प्रतिबद्धता जाहेर गरेको थियो । प्रतिबद्धता अनुसार रकम उपलब्ध गराउन नसकेको स्वीकार्दै एन्फाका महासचिव किरण राईले केहि दिनपछि भुक्तानी दिने तयारी भइरहेको बताएका छन् । महासचिव राईले भने, ‘नौं वटा क्लबको संयुक्त पत्र प्राप्त भएको छ । हामी उहाँहरुसँग यो विषयमा छलफल गरेर एउटा निकास निकाल्ने छौं । ’