कतार (हाम्रो खेलकुद) – सन् २०१८ मा रुसमा भएको फिफा विश्वकपमा जापान अन्तिम १६ मा बेल्जियमसँग अन्तिम समयमा गोल खाँदै बाहिरिएको थियो । यसपटक फिफा विश्वकप कतार २०२२ मा जापानले पुन: बेल्जियमकै सामना गर्ने सम्भावना थियो । तर क्रोएसियाले बेल्जियमलाई हराउँदै नकआउट चरणमा स्थान पक्का गर्यो ।

जापानले समूह चरणमा जर्मनी र स्पेनलाई हराउँदै समूह विजेता बन्यो । प्रशिक्षक हाजिमे मोरियासु क्रोएसियाविरुद्ध खेलका लागि टोली तयार रहेको बताउँछन् । उनले खेलको अघिल्लो दिन पत्रकार सम्मेलनमा जितको लय कायम राख्ने आशा राखेको बताए ।

‘तीन दिन भयो पछिल्लो खेलबाट । तयारी पनि राम्रो भएको छ । खेल निकै कठिन हुनेछ । खेलका लागि तयार छौं र आशा छ यस प्रतियोगितामा गरेको राम्रो प्रदर्शन जारी राख्नेछन्,’ उनले भने ।

‘गत संस्करण रुसमा हामी अन्तिम १६ पार गर्न चाहन्थ्यौं । हामी त्यसको लागि योग्य पनि थियौं ‌। तर मानसिक रुपमा हामी केहि कमजोर भएको पाएँ । उक्त खेलमा रणनीति पनि परिवर्तन गरेको भए राम्रो हुन्थ्यो होला । त्यसबेला पाएको अनुभव भने अहिले काम लागेको छ । त्यसलाई पाठको रुपमा लिएर यसपटक अघि बढ्ने छौं ।’

‘खेलको रणनीति र टोली छनोटबारे गरिएको प्रश्नमा उत्तर दिन सक्ने अवस्था छैन । हामी १ सय २० मिनेटको खेलका लागि तयार छौं । हामीले ६ खेलाडी परिवर्तन गर्न पाउनेछौं ‌। तर यो पूरै टोलीले खेल्ने खेल हो ।’

‘यसपटक जापानमा व्यक्तिगत रुपमा खेलाडी पनि राम्रो छन् । हामी टिमका रुपमा सधैं राम्रो प्रदर्शन गर्दै आएका छौं । तर पछिल्लो चार वर्षमा खेलाडी पनि सुधारिएका छन् र यसले हामीलाई थप बलियो बनाएको छ । रणनिती प्रयोग गर्न खेलाडी आफैं क्षमतावान् हुँदा सहज हुन्छ ।’

‘जापानले विश्वकप जित्न युवा परियोजनामा ध्यान दिएका छौं । यसले गर्दा राम्रा युवा खेलाडी आएका छन् । म मात्र नभएर जापान फुटबल संघले प्रशिक्षण क्षेत्रमा निकै मिहिनेत गरेको छ । जापानले प्राविधिक जनशक्ति बलियो बनाएर एसियाको फुटबलमा योगदान दिने प्रयास गरेको छ ।’

क्रोएसिया राम्रो खेलाडीहरु भएको टोली हो । गत संस्करणको उपविजेता पनि हो । हामी भोली जितका लागि खेल्नेछौं । विपक्षी टोलीप्रति सम्मान पनि छ । टिमको रुपमा क्रोएसिया निकै चलाख छ । खेलका क्रममा उनीहरु लामो समय खेल्न सक्छन् । हामी कठिन खेल अपेक्षा गरिरहेको छु ।