धरान (हाम्रो खेलकुद)– राष्ट्रिय फुटबल टोलीका कप्तान अनिल गुरुङ र युवा स्ट्राइकर बिमल घर्तीमगर सम्मिलित पश्चिमाञ्चल सातौं राष्ट्रिय खेलकुदको फुटबलबाट बाहिरिउको छ । सोमबार पूर्वाञ्चलसँग ३–१ ले पराजित भएसँगै पश्चिमाञ्चल प्रतियोगितबाट बाहिरिएको हो । पश्चिमाञ्चलले तीन मध्ये १ खेलमात्र जित्न सक्यो ।

अर्को समूहबाट नेपाल पुलिस क्लब र मध्यमाञ्चलले सेमिफाइनल पुगेका छन् । धरानको एन्फा टेक्निकल सेन्टरमा सोमबार पुलिसले मध्यमाञ्चललाई ३–१ ले हरायो । तर, पूर्वाञ्चलले पश्चिमाञ्चललाई ३–१ ले हराएपछि मात्र पुलिसको समूह खको विजेताका रुपमा अघि बढेको हो । मध्यमाञ्चल उपविजेताका रुपमा अन्तिम चारमा पुगेको हो ।
पुलिसका कप्तान जुमानु राईले पहिलो हाफको २१ औं मिनेटमा पेनाल्टीमा गोल गर्दै टोलीलाई अग्रता दिलाए । मध्यमाञ्चलका खेलाडीले रवि पासवानलाई पेनाल्टी बक्स भित्र लडाएपछि पुलिसले पेनाल्टी पाएको थियो । दोस्रो हाफको २९ औं मिनेटमा मध्यमाञ्चलका सञ्जीव कार्कीले आत्मघाती गोल गरे भने दोस्रो हाफको ४३ औं मिनेटमा राम वाग्लेले पुलिसका लागि गोल थपे । मध्यमाञ्चलका लागि दोस्रो हाफको २३ औं मिनेटमा दिनेश हेन्जनले एक गोल फर्काए ।
दोस्रो खेलमा पुर्वाञ्चलले पश्चिमाञ्चल क्षेत्रलाई ३–१ ले हरायो । पुर्वाञ्चलको लागि निसान लिम्बुले २ र सुशिल कुमार यादवले गोल गरे । निशासनले पाँचौं र सुशिलले २६ औं मिनेटमा गोल गरे । निशानले पहिलो हाफकै अन्त्य तिर अर्को गोल थपे । पश्चिमाञ्चलका कप्तान अनिल गुरुङले पहिलो हाफको २० मिनेट एक गोल फर्काएका थिए ।

पूर्वाञ्चल र पश्चिमाञ्चल प्रतियोगिताबाट बाहिरिएका छन् । मंगलबार सशस्त्र प्रहरीको एपिएफ र नेपाल आर्मीबीच पहिलो खेल तथा सुदुरपश्चिमाञ्चल क्षेत्र र मध्यपश्चिमबीच दोस्रो खेल हुनेछ ।