कतार (हाम्रो खेलकुद) – फिफा विश्वकप कतार २०२२ अन्तर्गत अन्तिम १६ चरणमा अर्जेन्टिनाले अष्ट्रेलियाको सामना गर्दैछ । खेलको पूर्व सन्ध्यामा टोलीका मिडफिल्डर रोड्रीगो डे पलले आफ्नो धारणा राखेका छन् ।

डे पलले अर्जेन्टिनाका लागि जारी विश्वकपको सबै खेलमा पूरा समय मैदान बिताएका छन् । तर उनले तीन खेलमा नै फरक मिडफिल्ड पार्टनर पाएका थिए । पहिलो खेलमा लिआन्द्रो पारेडेस, दोस्रो खेलमा गीदो रोड्रीग्वेज र तेस्रो खेलमा एन्जो फर्नान्डेजले डे पलसँग खेलेका छन् । तेस्रो खेलमा पोल्यान्डविरुद्ध भने अर्जेन्टिना केही फरक रणनीतिमा देखिएको थियो ।

डे पलले आफूलाई जोसँग खेलेपनि त्यसै अनुसार तयारी हुने गरेको बताए । ‘मलाई सबै तीन खेलाडीसँग सहज लागेको थियो । हामीले प्रशिक्षण त्यसै अनुसार गरेका छौं । हामीले सबै साझेदारीमा आफ्नो भूमिका प्रयोग गरेका छौं । मिडफिल्ड निकै महत्त्वपूर्ण पोजिसन हो । सबै खेलाडी टोलीलाई आवश्यक पर्दा खेल्न तयार छन्,’ उनले भने ।

डे पलले अष्ट्रेलियाविरुद्ध खेल विपक्षीका हिसाबले पोल्यान्डजस्तै हुने बताए । ‘हामीले अष्ट्रेलियाबारे बुझेका छौं । हामीले प्राप्त गरेको छोटो समयमा उनीहरुको भिडियो हेरेका छौं । पोल्यान्ड र अष्ट्रेलियाको खेल उस्तै हुन्छ । हामीसँग बल पोसेसन बढी भएपनि उनीहरुको विंगमा तीव्र गतिका खेलाडी छन् । त्यसैले हामीले मिडफिल्ड र डिफेन्समा पनि ध्यान दिनुपर्छ,’ उनले भने ।

अष्ट्रेलियाको बलियो पक्षमा पनि डे पल सजग रहे । ‘अष्ट्रेलियासँग दुई अग्ला सेन्टर डिफेन्डर छन् । त्यसैले पनि हामीले फ्रिकिकहरु दिनु हुँदैन । तीव्र गतिका विंगर भएकाले पनि काउन्टर अट्याकमा चनाखो हनुपर्नेछ,’ उनले सुनाए ।

डे पलले शारीरिक रुपमा पनि आफू खेलका लागि तयार रहेको बताए । ‘हामीले दुई दिनको अन्तरमा नै अर्को खेल खेल्नुपर्ने छ । हाम्रो ध्यान अहिले विश्राम गर्ने र खेलका लागि उच्च स्तरमा तयार कसरी हुने भन्नेमा छ । म आफैं लगातार सबै खेल खेलेपनि तयार छु । पूरा समय खेल्न पाउँदा राम्रो लाग्छ र अर्को खेलमा पनि त्यहि लक्ष्य हुनेछ,’ उनले टुंग्याए ।