सुबास हुमागाईं, कतार

एसियाली राष्ट्र जापानले पूर्व विश्वकप विजेता स्पेनलाई पराजित गर्दै फिफा विश्वकप कतार २०२२ अन्तर्गत समूह ई को विजेता बनेको छ । खलिफा रंगशालामा विहीबार दोस्रो हाफमा सानदार पुनरागमन गर्दै जापान २-१ को जित दर्ता गर्न सफल रहयो ।

पहिलो हाफमा एकपक्षीय देखिएको खेल दोस्रो हाफमा भने फेरियो । स्पेनले पहिलो हाफमा बल पोसेसनमा अत्याधिक पकड जमाउँदै आक्रमण बुनेको थियो । अग्रता लिएपछि स्पेनले पाएको थप अवसर सदुपयोग गर्न सकेन ।

त्यसको असर दोस्रो हाफमा देखियो । जापानले सुरुवाती समयमा नै लगातार गोल गर्दै स्पेनमाथि अग्रता लियो । जापानले त्यसपछि अग्रता जोगाउँदै स्पेनलाई स्तब्ध पार्यो ।

यस नतिजासँगै जापान ६ अंकसहित समूहको शीर्षस्थानमा रहेर नकआउट चरण प्रवेश गरेको छ । स्पेन ४ अंक जोड्दै समूहको दोस्रो स्थानमा रहेर अन्तिम १६ मा स्थान बनाउन सफल रहयो । जर्मनी ४ अंक जोडेपनि गोल अन्तरमा स्पेनभन्दा पछि रहयो । स्पेनको गोल अन्तर +६ तथा जर्मनी +१ मा रहयो । कोस्टारिका ३ अंकका साथ चौथो हुँदै बाहिरियो ।

छैटौं मिनेटमा स्पेनका कप्तान सर्जियो बुस्केट्सले पेनाल्टी क्षेत्र बाहिरबाट गरेको प्रहार बाहिरियो । लगत्तै अर्को तर्फ जुन्या इटोले पेनाल्टी क्षेत्रको दायाँबाट गरेको प्रहारले पोस्टको दिशा लिन सकेन ।

खेलको १२ औं मिनेटमा स्पेनले अग्रता लियो । सेजार एज्पिलीक्वेटाको क्रसमा अल्भारो मोराटाले हेडरमार्फत गोल गरे । उनले दुई डिफेन्डरको बिचमा उफ्रेर क्रससँग राम्रो सम्पर्क गर्दै स्पेनलाई अघि बढाए ।

२३ औं मिनेटमा मोराटाकै प्रहार गोलरक्षक शुइची गोन्डाले दोस्रो प्रयासमा नियन्त्रणमा लिए । गाभीको पासमा पेनाल्टी क्षेत्रको ठिक भित्रबाट मोराटाले गरेको शक्तिशाली प्रहार सिधै हातमा पुगेपनि गोन्डाले पहिलो प्रयास फुस्काएका थिए ।

दोस्रो हाफको सुरुवातमै जापानले लगातार गोल फर्कायो । ४८ औं मिनेटमा रित्सु डोआनले सुन्दर गोल गरे । स्पेनले आफ्नै पेनाल्टी क्षेत्रनिर बल खेलाउने प्रयास गर्दा दबाबमा रहेपछि राम्रो क्लियर गर्न नसक्दा जापानले बल खोस्यो । डोआनले पेनाल्टी क्षेत्र बाहिरबाट गरेको प्रहार गोलरक्षक उनाइ सिमोनको हातमा लाग्दै गोल भएको थियो ।

त्यसको दुई मिनेटमै जापानले अर्को गोल थप्यो । काओरु मितोमाले पेनाल्टी क्षेत्रबाट मैदानबाहिर जान लागेको बललाई बचाउँदै दिएको क्रसमा आओ तानाकाले गोल गरे । भिडियो असिस्टेन्ट रेफ्रीबाट निकै लामो समय परिक्षण गरेपछि गोल कायम रहेको निर्णय आएको थियो ।