कतार (हाम्रो खेलकुद) – फिफा विश्वकप कतार २०२२ अन्तर्गत समूह चरणको अन्तिम खेलमा स्पेनले जापानको सामना गर्दैछ । पहिलो हाफको खेल सकिँदा स्पेन १-० ले अघि छ ।

खेलको तीन चौथाई समय बल पोसेसनमा पकड जमाएको स्पेनले जापानलाई खेलमा फर्कने अवसर नै दिएको छैन । पोसेसनमा नहुँदा पनि विपक्षीमाथि द्रुत गतिमा दबाब कायम गर्दै स्पेनले अग्रता जोगाएको छ ।

छैटौं मिनेटमा स्पेनका कप्तान सर्जियो बुस्केट्सले पेनाल्टी क्षेत्र बाहिरबाट गरेको प्रहार बाहिरियो । लगत्तै अर्को तर्फ जुन्या इटोले पेनाल्टी क्षेत्रको दायाँबाट गरेको प्रहारले पोस्टको दिशा लिन सकेन ।

खेलको १२ औं मिनेटमा स्पेनले अग्रता लियो । सेजार एज्पिलीक्वेटाको क्रसमा अल्भारो मोराटाले हेडरमार्फत गोल गरे । उनले दुई डिफेन्डरको बिचमा उफ्रेर क्रससँग राम्रो सम्पर्क गर्दै स्पेनलाई अघि बढाए ।

२३ औं मिनेटमा मोराटाकै प्रहार गोलरक्षक शुइची गोन्डाले दोस्रो प्रयासमा नियन्त्रणमा लिए । गाभीको पासमा पेनाल्टी क्षेत्रको ठिक भित्रबाट मोराटाले गरेको शक्तिशाली प्रहार सिधै हातमा पुगेपनि गोन्डाले पहिलो प्रयास फुस्काएका थिए ।

समूहको अर्को खेलमा जर्मनीले कोस्टारिकाविरुद्ध १-० को अग्रता लिएको छ । अहिलेकै स्कोर अन्त्यसम्म कायम रहे स्पेन समूह विजेता र जर्मनी उपविजेता बन्दै अघि बढ्नेछन् । अहिलेको अवस्थामा स्पेन ७ अंकसहित समूहको शीर्षस्थानमा रहनेछ । जर्मनी ४ अंकका साथ दोस्रो हुनेछ । जापान र कोस्टारिका ३-३ अंकका साथ तेस्रो र चौथो हुनेछन् ।