कतार (हाम्रो खेलकुद) – फिफा विश्वकप कतार २०२२ अन्तर्गत समूह चरणको अन्तिम खेलमा जर्मनीले कोस्टारिकाको सामना गर्दैछ । पहिलो हाफको खेल सकिँदा जर्मनी १-० ले अघि छ ।

बल पोसेसनमा पकड जमाएको जर्मनीले पटक पटक कोस्टारिकाको डिफेन्स पार गरेको छ । तर गोलरक्षक तथा कप्तान केलर नाभास लगातार बाधक बनिरहेका छन् । जित्नैपर्ने खेलमा आक्रामक रणनीति लिएर उत्रेको जर्मनीले अग्रता लिएपछि काउन्टर अट्याकमा भने सचेत हुनुपरेको छ ।

सातौं मिनेटमा जर्मनीका जमाल मुसियालाले पेनाल्टी क्षेत्रभित्र ५ डिफेन्डरलाई बिट गरेपनि प्रहार गर्ने अवसर पाएनन् । उनले दिएको अन्तिम पासमा थोमस मुलर र लिओन गोरेट्जका बलियो प्रहार गर्न चुके ।

दशौं मिनेटमा जर्मनीले सर्ज नाब्रीको गोलमा अग्रता लियो । डेविड रमको क्रसमा नाब्रीले गरेको हेडर गोलमा परिणत भएको थियो । १४ औं मिनेटमा गोरेट्जका को हेडरलाई कोस्टारिकाका कप्तान तथा गोलरक्षक केलर नाभासले विफल पारे ।

४० औं मिनेटमा लेरोय सानेले पेनाल्टी क्षेत्र भित्रबाट गरेको प्रहारमा नाभास बिट भएपनि बल पोस्टभन्दा थोरै परबाट गयो । ४२ औं मिनेटमा कोस्टारिकाले खेलमा फर्कने सुवर्ण अवसर खेर फाल्यो । जर्मन डिफेन्डरद्वय डेविड रम र एन्टोनियो रुडीगरले लगातार गल्ती गरेपछि केशर फुलरले वन भर्सेस वनको स्थितिमा गोल गर्न सकेनन् । उनको शक्तिशाली प्रहार गोलरक्षक म्यानुएल नोएरले पन्च गरिदिए ।

समूहको अर्को खेलमा स्पेनले जापानविरुद्ध १-० को अग्रता लिएको छ । अहिलेकै स्कोर अन्त्यसम्म कायम रहे स्पेन समूह विजेता र जर्मनी उपविजेता बन्दै अघि बढ्नेछन् । अहिलेको अवस्थामा स्पेन ७ अंकसहित समूहको शीर्षस्थानमा रहनेछ । जर्मनी ४ अंकका साथ दोस्रो हुनेछ । जापान र कोस्टारिका ३-३ अंकका साथ तेस्रो र चौथो हुनेछन् ।