एजेन्सी – एसियाली राष्ट्र कतारमा जारी फिफा विश्वकप २०२२ मा आज समूह ‘ई’ र ‘एफ’ का अन्तिम राउन्डका खेलहरुमा प्रतिस्पर्धा हुदैछ ।

समूह एफमा रहेको मोरक्को अघिल्लो चरण पुग्ने सम्भावना जीवित राख्न प्रतियोगिताबाट बाहिरिसकेको क्यानडासँग खेल्दैछ । खेल राति ८ः४५ बजेपछि अल थुमामा रंगशालामा हुनेछ । यही समयमा क्रोएसिया र बेल्जियमबीच खेल हुनेछ ।

मोरक्कोलाई क्यानडासँगको कबराबरी नै अन्तिम १६ मा पुग्न पर्याप्त हुनेछ । क्यानडालाई हराएमा मोरक्को दोस्रोपटक अन्तिम १६ मा पुग्नेछ । मोरक्कोको समूह विजेता बन्ने सम्भावना पनि छ । आँफुले जितेर क्रोएसिया बराबरीमा रोकिएका वा पराजित भएमा मोरक्को क्यानडालाई हराएर समूह विजेता बन्न सक्छ ।

छैटौंपटक विश्वकप खेलिरहेको मोरक्को दोस्रोपटक नकआयट चरणमा पुग्न चहान्छ । मोरक्कोले यसअघि १९८६ मा समूह चरण पार गरेको थियो । त्यसपछि १९९४, १९९८ र २०१८ मा समूह चरण पार गर्न सकेन । क्यानडाविरुद्ध मोरक्को निश्चित जितको लागि मैदान उत्रनेछ ।

टोलीसँग यासिन बोनो, अक्रफ हाकिमी, नुसेर माजारोइ, रोमन साइस, नायेफ अगेर्ड, अक्रफ दारी, जवाद एल यामिक, याहिया अतिआत अलाल, बादर बेनुन, सोफ्यान अम्रबाट, सलिम अमल्लाह, अब्दलहमिद सबिरी, अजेदिन ओउनाही, बिलेल एल खानुस, याह्या जब्राने, हाकिम जिएच, युसुफ एन–नेस्री, सोफियाने बोउफाल, जाकारिया अबौख्लाल, एज आब्दे, अमिन हारित, इलिअस चेअर, अब्देरजक हम्दाला र वालिद चेदिरा रहेका छन् ।

यता, क्यानडा पनि आफ्नो अन्तिम खेलमा मोरक्कोलाई हराएर विश्वकपमै पहिलो जित निकाल्न चहान्छ । सन् १९८६ मा पहिलो विश्वकप खेलेको क्यानडाले त्यसबेला तीन खेलमा गोल गर्न सकेको थिए । यसपटक गोल गरिसकेको छ ।

क्यानडासँग मिलान बोर्जन, कमल मिलर, स्टिभन भिटोरिया, जोएल वाटरम्यान, डेरेक कर्नेलियस, साम एडेकुग्वे, एलिस्टेएर जोनस्टन, रिची लारेआ, एटिबा हचिन्सन, जोनाथन ओसोरियो, मार्क–एन्थोनी काए, साम पिएट, स्माइल कोन, लियाम फ्रासेर, डेभिड वुदर्सपुन, ताजोन बुचानन, अल्फन्सो डाभिस, जोनाथन डेभिड, जुनियर होइलेट, साइल लारिन, लुकास काभालिनी, लियाम मिलर र इके उग्वो छन् । ह्यामस्ट्रिङका कारण स्टिफन युस्टाक्वियोले खेल्ने सम्भावना न्युन छ ।

यि दुई टाेली हालसम्म तीनपटक खेल्दा माेरक्काे अपराजित छ । माेरक्काेले दुई खेल जित्दा एक खेल बराबरीमा सकिएकाे छ । यि दुई टाेली पछिल्लाेपटक सन् २०१६ मा खेल्दा माेरक्काेले ४–० काे फराकिलाे जित निकालेकाे थियाे ।