एजेन्सी – एक खेल बाँकी छँदै नकआउट चरणमा स्थान सुरक्षित गरिसकेको फ्रान्सले फिफा विश्वकप कतार २०२२ अन्तरगत आज बुधबार समूह चरणको अन्तिम खेलमा ट्युनिसियाको सामना गर्दैछ ।

ट्युनिसिया र फ्रान्सबीचको खेल कतारको दोहास्थित एजुकेशन सिटी रंगशालामा राति ८ः४५ बजेपछि हुनेछ । साविकको विजेता फ्रान्स एक खेल बाँकी छँदै नकआउट चरणमा पुगिसकेको छ ।

फ्रान्सलाई पराजित भएपनि कुनै असर हुनेछैन । तर टोली जित निकालेर समूह विजेता बन्दै अघिल्लो चरणमा पुग्ने दाउमा हुनेछ । बराबरीले पनि फ्रान्स समूह विजेता बन्नेछ । हारले अर्काे खेलमा अष्ट्रेलियाले डेनमार्कलाई फराकिलो अन्तरमा हराएको अवस्थामा फ्रान्स उपविजेता हुनेछ ।

विश्वकपअघि चोटका कारण चार स्टार खेलाडी बाहिरिएसँगै फ्रान्सको प्रदर्शन कमजोर हुने आँकलनको विपरित टोलीले लगातार उच्च प्रदर्शन गरिरहेका छन् । टोलीसँग लयमा रहेका फरवार्ड केलियन एमबाप्पेको साथ रहेको छ । एमबाप्पेले दुई खेलमा ३ गोलसँगै एक असिस्ट प्रदान गरिसकेको छ । उनी नै टोलीको मुख्य हतियार हुनेछ ।

यसबाहेक फ्रान्ससँग ह्युगो लोरिस, लुकास हर्नान्डेज, थिओ हर्नान्डेज, इब्राहिमा कोनाटे, जुल्स कुन्डे, बेन्जामिन पाभार्ड, विलियम सालिबा, दायोट उपमेकानो, राफाएल भारान, एडुआर्डो कामाभिंगा, एड्रिएन राविओट, ओरेलिएन चुआमेनी, किंग्सले कोमान, ओस्मान डेम्बेले, ओलिभर जिरुड, एन्टोइन ग्रिजमन मार्कस थुराम रहेका छन् ।

यता, ट्युनिसियालाई अघिल्लो चरण पुग्न फ्रान्सलाई हराउनुको साथै अर्काे खेलमा अष्ट्रेलिया र डेनमार्कबीचको खेलको नतिजा आँफु अनुकुल आउनुपर्नेछ । ट्युनिसिया पनि विश्व विजेता फ्रान्सलाई स्तब्ध पार्दै नकआउट चरण पुग्ने प्रयासमा हुनेछ । यस विश्वकपमा दुई खेल खेल्दा ट्युनिसियाले गोल गर्न सकेको छैन । ट्युनिसिया गोल र जितको लक्ष्यमा हुनेछ ।

ट्युनिसियासँग एमेन दाहमेन, मोहमद ड्रागर, वाज्दी केच्रिदा, बिलेल इफा, मोन्टासार ताल्बी, डिलान ब्रोन, यासिन मेरिआ, नादेर घान्द्री, अल मालुल, अलि अब्दी, एलेय्स स्खिरी, आइस लाइदुनी, फेर्जानी सासी, घाएलेन चालेली, मोहमद अलि, बेन रोम्धाने, हानिबल मेज्ब्री, सिफेदीन जाजिरी, नाइम सिल्ती, ताहा यासिन खेनिसी, अनिस बेन स्लिमाने, इसाम जेबाली, वाह्बी खाज्री र युसुफ साक्नी रहेका छन् ।

यि दुई टोलीबीच हालसम्म पाँचपटक प्रतिस्पर्धा भएको छ । जसमा फ्रान्सले दुई खेल जितेको छ । दुई खेल बराबरीमा सकिदा एक खेल ट्युनिसियाले जितेको छ । ट्युनिसियाले सन् १९७१ मा २–१ को जित निकालेको थियो ।

त्यसपछि यि दुई टोली पछिल्लोपटक सन् २०१० मा मैत्रीपूर्ण खेलमा प्रतिस्पर्धा गर्दा खेल १–१ गोलको बराबरीमा सकिएको थियो । त्यसको १२ वर्षपछि यि दुई टोली एक आपसमा प्रतिस्पर्धा गर्न लागेको हो ।