कतार (हाम्रो खेलकुद) – फिफा विश्वकप कतार २०२२ अन्तर्गत समूह ए को खेलमा नेदरल्यान्ड्स र सेनेगलले पहिलो हाफमा अग्रता लिएका छन् । दुवै टोलीले आ-आफ्नो खेलमा १-० को अग्रता लिएका हुन् ।

कोडी गाक्पोको गोलमा नेदरल्यान्ड्सले अग्रता लिएको हो । कतारले केहि अवसर बुनेपनि गोल फर्काउन सकेको छैन । नेदरल्यान्ड्स अपराजित रहँदै समूहविजेताको रुपमा अघि बढ्ने पथमा रहेको छ । प्रतियोगिताबाट बाहिरिसकेको आयोजक कतार भने सान्त्वना अंकको खोजीमा खेलिरहेको छ ।

तेस्रो मिनेटमा कतारका कप्तान हसान अलहेदोसले पेनाल्टी क्षेत्र बाहिरबाट गरेको प्रहार गोलरक्षक एन्द्रिज नोपर्टले सहजै बचाए । अर्कोतर्फ मेम्फिस डिपाएले पेनाल्टी क्षेत्र भित्रबाट गरेको प्रहार डिफेन्डरको भिडबाट छिर्दै कर्नर भएको थियो ।

खेलको २६ औं मिनेटमा कोडी गाक्पोले गोल गर्दै नेदरल्यान्ड्सलाई अग्रता दिलाए । मिडफिल्डबाट मेम्फिस डिपाएले सुरुवात गरेको आक्रमणलाई कोडी गाक्पोले फिनिस गरे । डिपाए, डेभि क्लासेन र गाक्पोले पास खेल्दै डिफेन्स चिरेपछि गोल सम्भव भएको थियो । गाक्पोले अन्तिम पासलाई पेनाल्टी क्षेत्रभित्र लग्दै वन भर्सेस वनमा सहज फिनिस गरे । विश्वकपमा उनको यो तेस्रो गोल हो ।

खेलमा पछि परेको अर्को मिनेटमै कतारका मोहमद इस्माइलको प्रहार नोपर्टले दोस्रो प्रयासमा बचाए । इन्ज्युरी समयमा डिपाएले पेनाल्टी क्षेत्र बाहिरबाट गरेको प्रहारले पोस्टको दिशा लिन सकेन ।

समूहकै अर्को खेलमा सेनेगलले इक्वेडरविरुद्ध पहिलो हाफमा १-० को अग्रता लिएको छ । इस्माएला सारले खेलको ४४ औं मिनेटमा पेनाल्टीमा गोल गर्दै अग्रता दिलाएका हुन् । पिएरो हिन्कापीले पेनाल्टी क्षेत्रभित्र फल गरेपछि रेफ्रीले दिएको पेनाल्टीमा सारले गोल गरेका थिए ।

हाफ टाइमको स्कोरअनुसार नेदरल्यान्ड्स समूह विजेता र सेनेगल उपविजेता बन्दै अघि बढ्ने समीकरण रहेको छ । इक्वेडर यस खेलमा बराबरी खेलेपनि नकआउट चरणमा प्रवेश गर्नेछ । तर सेनेगलले जित हासिल गरे इक्वेडरले कतारको जितको कामना गर्नुपर्नेछ ।