कतार (हाम्रो खेलकुद) – फिफा विश्वकप कतार २०२२ अन्तर्गत ब्राजिल लगातार दोस्रो जित दर्ता गर्दै नकआउट चरणमा स्थान बनाउन सफल भएको छ । समूहको अन्तिम खेल बाँकी रहँदै नकआउट चरण पुग्ने ब्राजिल दोस्रो टोली हो ।

ब्राजिलले पहिलो खेलमा सर्बियालाई २-० ले पराजित गरेको थियो । उक्त खेलमा रिचार्लीसनले दुई गोल गर्दै ब्राजिललाई जितसम्म डोर्याएका थिए । ब्राजिलले सोमबार दोस्रो खेलमा स्विटजरल्यान्डलाई १-० ले पराजित गर्दै दोस्रो जित दर्ता गर्यो । क्यासेमिरोले ८३ औं मिनेटमा गोल गर्दै ब्राजिललाई जित दिलाएका थिए ।

समूह जी मा ब्राजिलले २ खेलमा ६ अंक जोडेको छ । यस समूहमा स्विटजरल्यान्डले २ खेलमा ३ अंक जोड्दा क्यामरुन र सर्बियाको १-१ अंक छ । यसअघि स्विटजरल्यान्डले पहिलो खेलमा क्यामरुनलाई १-० ले हराएको थियो । त्यस्तै सोमबार नै सर्बिया र क्यामरुनको खेल ३-३ को बराबरीमा सकिएको थियो ।

ब्राजिलभन्दा अघि समूह डी बाट फ्रान्सले विश्वकपको नकआउट चरणमा स्थान पक्का गरिसकेको थियो । फ्रान्सले पहिलो खेलमा अष्ट्रेलियालाई ४-१ ले हराएको थियो । दोस्रो खेलमा डेनमार्कलाई २-१ ले हराउँदै फ्रान्स लगातार दुई जितका साथ नकआउट चरणमा प्रवेश गरेको थियो ।

यस समूहमा फ्रान्सले २ खेलमा ६ अंक जोड्दा अष्ट्रेलियाको २ खेलमा ३ अंक छ । डेनमार्क र ट्युनिसियाको १-१ अंक छ । पहिलो खेलमा डेनमार्क र ट्युनिसियाको खेल बराबरीमा सकिएको थियो । त्यस्तै अष्ट्रेलियाले दोस्रो खेलमा ट्युनिसियालाई १-० ले हराउँदै जित निकालेको थियो ।

प्रतियोगिताको समूह चरणबाट भने हालसम्म कतार र क्यानडा मात्र बाहिरिएका छन् । दुवै टोलीले सुरुवाती दुई खेलमा हार बेहोरेका हुन् । कतार पहिलो खेलमा इक्वेडरसँग २-० र दोस्रोमा सेनेगलसँग ३-१ ले पराजित भएको थियो । क्यानडाले बेल्जियमसँग १-० र क्रोएसियासँग ४-१ को हार बेहोरेको थियो ।